AQSh Ormýz buǵazynda atyp túsirilgen tikushaǵyna jaýap retinde Iranǵa soqqy jasady
ASTANA. KAZINFORM – AQSh prezıdenti Donald Tramp Tegerandy Ormýz buǵazy ústinde amerıkalyq tikushaqty atyp túsirdi dep aıyptaǵannan keıin, AQSh Iranǵa soqqy jasady, dep habarlaıdy BBC.
AQSh Ortalyq qolbasshylyǵynyń málimetinshe, amerıkalyq áskerı kúshter seısenbi kúni shyǵys jaǵalaý ýaqytymen saǵat 17:00-de tikushaqtyń atyp túsirilýine jaýap retinde soqqy bere bastaǵan.
– Bul operatsııa Irannyń sebepsiz agressııasyna berilgen teńgerimdi jaýap, – delingen Ortalyq qolbasshylyqtyń málimdemesinde.
Axios basylymy AQSh ókiline silteme jasap, amerıkalyq áskerı kúshterdiń Irannyń birneshe áýe qorǵanysy júıesi men radıolokatsııalyq stantsııasyna soqqy jasaǵanyn habarlady.
AQSh prezıdenti Donald Tramp seısenbi kúni Irannyń bir kún buryn Ormýz buǵazy mańynda amerıkalyq Apache áskerı tikushaǵyn atyp túsirgenin málimdegen edi.
– Tamasha armııamyz keshe keshke Ormýz buǵazynda patrýldik maqsatta ushyp júrgen bizdiń joǵary tehnologııaly Apache tikushaqtarymyzdyń birin ırandyqtardyń atyp túsirgeni týraly jańa ǵana habarlady. Onda eki ushqysh boldy, ekeýi de aman-esen. Soǵan qaramastan, Amerıka Qurama Shtattary bul shabýylǵa jaýap berýi tıis, – dep jazdy Tramp óziniń Truth Social áleýmettik jelisindegi paraqshasynda.
ABC News telearnasyna bergen suhbatynda Tramp Iranǵa jasalatyn jaýap soqqylarynyń «óte kúshti» bolatynyn eskertti.
– Biz dál qazir jaýap berip jatyrmyz. Bul – olardyń bizdiń tikushaǵymyzǵa keshe túnde jasaǵan áreketine jaýap. Men bul jaýap óte kúshti, óte qýatty bolýy kerek dep esepteımin jáne dál sondaı bolyp jatyr, – dedi AQSh prezıdenti.
Eske sala ketsek, buǵan deıin Taıaý Shyǵystaǵy munaı tasymaly ózgerýi múmkin ekenin jazdyq. Sebebi Iran tóńiregindegi soǵys saldarynan Ormýz buǵazy arqyly ótetin trafıktiń 95%-y qysqaryp, tankerdiń bir reısin saqtandyrý quny 8 mln dollarǵa deıin ósti.
