AQSh Ormýz buǵazy men Hark aralyn baqylaýǵa alý úshin qurlyq áskerin kúsheıtpek
ASTANA. KAZINFORM – Reuters agenttiginiń tórt jasyryn derekkózge silteme jasap habarlaýynsha, Donald Tramp ákimshiligi Parsy shyǵanaǵy aımaǵyna myńdaǵan áskerı qyzmetker jiberý máselesin talqylap jatyr. Bul qadam prezıdentke aldaǵy áreketter úshin qosymsha nusqalar usyný maqsatynda qarastyrylyp jatyr, dep habarlaıdy Reuters agenttigi.
Agenttik málimetinshe, yqtımal nusqalardyń biri — Ormýz buǵazy ústinen baqylaý ornatý. Bul negizinen teńiz jáne áýe kúshteri arqyly júzege asyrylýy múmkin, alaıda buǵaz jaǵalaýyn baqylaýǵa alý úshin qurlyq áskerleri qajet bolýy yqtımal.
Ekinshi yqtımal nusqa — Hark aralyn basyp alý. Bul aral arqyly Iranda óndiriletin munaıdyń shamamen 90%-y eksporttalady. Alaıda bul jospar óte qaýipti dep baǵalanyp otyr, óıtkeni aral Irannyń zymyrandary men drondarynyń qoljetimdi aımaǵynda ornalasqan. Sonymen qatar, AQSh qoǵamynda Iranmen soǵys qoldaý tappaıdy, al yqtımal shyǵyndar ákimshiliktiń ishki saıası jaǵdaıyn ýshyqtyrýy múmkin.
Budan bólek, AQSh qurlyq áskerin Irannyń joǵary deńgeıde baıytylǵan ýran qorlaryn baqylaýǵa alý úshin paıdalaný múmkindigin de qarastyryp otyr.
Kelesi aptada aımaqqa shamamen 2000 adamnan turatyn teńiz jaıaý áskeriniń ekspedıtsııalyq toby kelýi tıis. Degenmen Reuters derekkózderiniń aıtýynsha, qazirgi ýaqytta ákimshilik budan da kóp kúsh jiberý múmkindigin talqylap jatyr.
Biraq Pentagon bul máselege qatysty túsinikteme berýden bas tartqan.
Aıta keteıik, buǵan deıin AQSh ırandyq Harg munaı torabyndaǵy áskerı nysandardy atqylaǵanyn jazdyq.
