AQSh Ormýz buǵazy mańyndaǵy Iran nysandaryna taǵy da soqqy jasady
ASTANA. KAZINFORM – AQSh áskeri Ormýz buǵazy arqyly ótetin azamattyq kemelerge tónetin qaýipti azaıtý maqsatynda Irandaǵy nysandarǵa jańa soqqylar jasaı bastaǵanyn málimdedi, dep habarlaıdy DW.
AQSh Qarýly kúshteriniń Ortalyq qolbasshylyǵy (CENTCOM) 13 shildege qaraǵan túni Iranǵa qarsy jańa shabýyldar bastalǵanyn habarlady.
– Bul operatsııanyń maqsaty – Ormýz buǵazy arqyly kedergisiz qatynaıtyn azamattyq teńizshiler men kommertsııalyq kemelerge Irannyń shabýyl jasaý múmkindigin odan ári álsiretý. Joǵarǵy bas qolbasshy Iran kúshterin jaýapkershilikke tartý úshin osy soqqylardy jasaý týraly buıryq berdi, – delingen CENTCOM-nyń X áleýmettik jelisindegi málimdemesinde.
Irannyń IRIB memlekettik telearnasynyń habarlaýynsha, jarylystar Bender-Abbas portynyń batysynda, Sırık qalasy mańynda, Keshm aralynda jáne Ormýz buǵazy aımaǵyndaǵy Djask qalasynda bolǵan.
Mehr agenttiginiń málimetinshe, Keshm aralyndaǵy shabýyl saldarynan bir adam qaza taýyp, eki adam jaralanǵan.
Irannyń Islam revolıýtsııasy saqshylar korpýsy (KSIR) AQSh pen Izraıldiń Iranǵa qarsy soǵysy bastalǵanǵa deıin álemdik munaı saýdasynyń shamamen 20 paıyzy ótken Ormýz buǵazy «AQSh-tyń aımaqtaǵy aralasýy toqtaǵanǵa deıin jabyq kúıinde qalatynyn» málimdedi.
Alaıda AQSh áskeri bul málimdemeni joqqa shyǵardy.
– Iran Ormýz buǵazyn baqylap otyrǵan joq. Keme qatynasy qalypty rejımde jalǵasyp jatyr, – dep málimdedi CENTCOM.
Osyǵan uqsas málimdemeni 12 shildede AQSh prezıdenti Donald Tramp ta jasady.
Irannyń qarymta soqqysy
12 shildege qaraǵan túni AQSh áskeri Irandaǵy shamamen 140 áskerı nysanǵa, sonyń ishinde zymyran jáne dron qoımalaryna, sondaı-aq baılanys toraptaryna soqqy jasaǵanyn habarlady.
Vashıngtonnyń málimetinshe, bul shabýyl KSIR-diń Ormýz buǵazyndaǵy GFS Galaxy konteıner kemesine jasaǵan áreketine jaýap boldy. Al Iran tarapy azamattyq kemege Tegeran bekitken baǵyttan aýytqyǵany úshin tek «eskertý retinde oq atylǵanyn» málimdedi.
12 shildedegi AQSh shabýyldarynan keıin Iran Parsy shyǵanaǵyndaǵy birneshe elge jáne Iordanııaǵa soqqy jasady.
KSIR-diń málimetinshe, shabýyldardyń nysanasy Katardaǵy Ál-Ýdeıd amerıkalyq áýe bazasy men Irannyń aıtýynsha AQSh avıanosetsteri paıdalanatyn Omandaǵy Dýkm porty bolǵan.
Sol kúni Tegeran Ormýz buǵazynda bir táýlik ishinde ekinshi kemeniń qozǵalysy toqtatylǵanyn da habarlady.
Eske sala ketsek, BUU basshysy Iran men AQSh-ty kelissózdi shuǵyl qaıta bastaýǵa shaqyrdy.
