AQSh Ormýz buǵazy arqyly kemelerdi alyp ótý úshin koalıtsııa qurýdy josparlap otyr

ASTANA. KAZINFORM — AQSh prezıdenti Donald Tramptyń ákimshiligi bir apta ishinde Irannyń jaǵalaýymen ótetin Ormýz buǵazy arqyly kemelerdi alyp júrý úshin halyqaralyq koalıtsııa qurýdy josparlap otyr.

Birneshe el strategııalyq mańyzdy buǵazda keme qatynasynyń qaýipsizdigin qamtamasyz etý úshin koalıtsııa qurý týraly kelisimge keldi, dep habarlaıdy The Wall Street Journal. 

Ázirge kemelerdi alyp júrý operatsııalary soǵys qımyldary aıaqtalǵanǵa deıin, álde keıin bastalatyny belgisiz. Bul másele áli de talqylanyp jatyr.

Kóp el osyǵan baılanysty táýekelderdi eskere otyryp, soǵys qımyldary toqtatylǵanǵa deıin mundaı mıssııaǵa qatysýǵa ashyq túrde mindetteme alýdan bas tartyp otyr. Sondyqtan áleýetti koalıtsııa músheleriniń quramy týraly aqparat jarııalanbady.

Osy arada Iran Syrtqy ister mınıstri Seıed Abbas Aragchı Ormýz buǵazy amerıkandyq jáne odaqtastardyń kemelerin qospaǵanda, halyqaralyq keme qatynasy úshin ashyq ekenin aıtty.

Irannyń bas dıplomaty Al-Araby Al-Jadeed basylymyna bergen suhbatynda Tegeran buǵazdy jappaǵanyn jáne onyń halyqaralyq tasymaldar úshin jumysyn jalǵastyryp jatqanyn atap ótti. Osylaısha ol Iran AQSh pen Izraılge qatysy bar kemeler úshin buǵazdy japty degen habarlamalarǵa túsinikteme berdi.

Buǵan deıin BUU Bas hatshysynyń gýmanıtarlyq máseleler jónindegi orynbasary jáne tótenshe kómek úılestirýshisi Tom Fletcher Ormýz buǵazy arqyly gýmanıtarlyq júkterdiń qaýipsiz ótýin qamtamasyz etýge shaqyrdy.