AQSh, Ońtústik Koreıa jáne Japonııa Phenıanǵa qatysty sanktsııalardy qatańdatpaq
ASTANA. QazAqparat - AQSh, Ońtústik Koreıa jáne Japonııa resmı Phenıanǵa qatysty sanktsııalardy qatańdatýǵa daıyn. Mundaı málimdemeni Soltústik Koreıa máselelerimen aınalysatyn AQSh ókili jasady, dep habarlady www.24.kz.
Oǵan qosa, AQSh áskerı áýe kúshteriniń ushaqtary Ońtústik Koreıanyń Soltústik Koreıaǵa jaqyn mańaıymen ushyp, ses kórsetti. Amerıka áýe kúshteriniń bombalaýshy eki ushaǵy Soltústik Koreıa shekarasynan 80 shaqyrymda barlaý jasap, Gýam aralyndaǵy Ońtústik Koreıanyń bazasyna qaıta oraldy. Olardyń bul áreketi jaqynda ǵana ıadrolyq synaq ótkizgen Soltústik Koreıaǵa ses kórsetý edi.: -
«Búgin óz ushaqtarymyzdy ushyrý arqyly odaǵymyzdyń qanshalyqty qaýqary bar ekenin kórsetkimiz keldi. Múmkindikterimiz úlken. Olar bizge baǵyttalǵan kez-kelgen jaýǵa toıtarys berýge daıyn», - deıdi Ońtústik Koreıadaǵy AQSh áskeriniń qolbasshysy Vınsent Brýks.
Málimetterge qaraǵanda, Soltústik Koreıa bes ret ıadrolyq synaq júrgizgen. Onyń ekeýi osy jyly jaryldy. Mamandar sońǵy ıadrolyq synaqtyń buǵan deıingilerge qaraǵanda óte joıqyn bolǵanyn aıtyp otyr. Al ıadrolyq synaq júrgizilgen aımaqtyń áýeden túsirilgen fotosýretterin zerttegen Ońtústik Koreıa bıligi Phenıan jaqyn arada taǵy bir ıadrolyq synaq jasaýy múmkin dep kúdiktenedi. Osyǵan baılanysty AQSh, Japonııa jáne Ońtústik Koreıa, Soltústik Koreıaǵa qarsy qatań sharalar qabyldaýǵa kelisken.
«Soltústik Koreıa bir jyl ishinde eki ret ıadrolyq synaq ótkizdi. Oǵan qosa 20-dan astam zymyran ushyrdy. Osynyń barlyǵy resmı Phenıannyń halyqaralyq talaptarǵa qulaq aspaıtynyn kórsetip otyr. Sondyqtan sanktsııalardy barynsha jyldam ári qatań túrde salý kerek», - dedi AQSh-tyń Soltústik Koreıa máseleleri jónindegi ókili Son Kım.
Soltústik Koreıanyń ıadrolyq synaǵy halyqaralyq uıymdar men birqatar eldiń synyna ushyrady. Qazaqstan Syrtqy ister mınıstrligi ıadrolyq synaqtyń Soltústik Koreıaǵa tıimsiz ekenin málimdedi. Birikken Ulttar uıymy Phenıanǵa qarsy eshqandaı shara qabyldamasa da, ıadrolyq synaqty qatań aıyptady.
«Soltústik Koreıanyń ıadrolyq belsendiligin qarar boıynsha baqylaýda ustaý úshin qosymsha sharalar qabyldaımyz. Olar qarardaǵy erejelerdi eshkim buza almaıtyndaı bolyp qabyldanýy tıis», - dedi Ońtústik Koreıanyń qaýipsizdik isteri jónindegi ókili Kım Hon Gıýn.
Eger Halyqaralyq uıymdar Soltústik Koreıaǵa qarsy jańa sanktsııa salsa, áýpirimdep kúneltip otyrǵan turǵyndar tyǵyryqqa tireledi. Onsyz da ál-aýqaty álsiz elde nóser jaýyp, tasqyn bolyp, ondaǵan myń adam baspanasyz qaldy. 130-dan astam turǵyn qaza tapty. Azyq-túlik tapshylyǵy jáne bar. Bir sózben aıtqanda, el halyqaralyq uıymdardyń gýmanıtarlyq kómegine muqtaj.
