AQSh okrýginiń sherıfi Tsarnaevtyń jerlenýin zańdy dep tanydy
ASTANA. 13 mamyr. QazAqparat - Tamerlan Tsarnaev jasyryn túrde jerlengen Vırdjınııa shtaty Kerolaın okrýginiń sherıfi lańkestikke kúdiktini jerleýge arnalǵan qujattardan eshbir kinárat tabylmaǵandyǵyn málim etti.
Bul týraly CNN telearnasyna silteme jasap Reseı Jańalyqtar agenttigi habarlady.
«Ókinishke qaraı, endi biz bul qaıǵyly oqıǵaǵa, lańkestikke kúdiktilerdiń biri jerlengen jer retinde máńgilikke baılanystymyz», - dedi sherıf Tonı Lıppa.
Onyń aıtýynsha, olar qalanyń merimen birge Tsarnaevty jerleýge arnalǵan qujattardy jiti oqyp shyqqan jáne olardan eshbir buzýshylyqty tappady. Onymen birge, buǵan deıin habarlanǵandaı, barlyq qajetti rásimder saqtalǵan jaǵdaıda jergilikti bılikti jerleý týraly eskertý mindetti emes.
Bostondaǵy lańkestikti jasady degen kúdik taǵylǵan T.Tsarnaevtyń denesin Massachýsetstiń, sondaı-aq birqatar ózge shtattardyń zırattary qabyldaýdan bas tartty. Biraq, beısenbige qaraǵan túni T.Tsarnaevtyń máıti Kerolaın okrýginiń Dosýell qalasyndaǵy musylman zıratynda jasyryn túrde jer qoınyna tapsyryldy. Bul, jerleý qujattary zańsyz dep tanylǵan jaǵdaıda máıtti qaıta jerleý múmkindigin qarastyryp otyrǵan jergilikti bılik úshin kútpegen jaǵdaı boldy.
Eske salaıyq, 15 sáýir kúni Bostonda ótken halyqaralyq marafon kezindegi jarylystardan úsh adam mert bolyp, 250-den astamy zardap shekti. Kóz jumǵan Tamerlan Tsarnaevtan bólek lańkestik aktini uıymdastyrýda onyń inisi Djohar Tsarnaev aıyptalýda. Qazir ol polıtsııanyń qolynda.
