AQSh Ókilder palatasynyń músheleri Qytaıǵa saparyn qaıta bastady

ASTANA. KAZINFORM – Ókilder palatasynyń eki partııaly toby osy aıdyń sońynda Qytaıǵa resmı saparmen barady. Bul palata músheleriniń 2019 jyldan bergi alǵashqy resmı sapary bolmaq, dep habarlaıdy NBC News. 

AQSh Kongresiniń Qytaıdaǵy delegatsııasyn Ókilder palatasynyń Demokratııalyq partııadan múshesi, Ókilder palatasynyń Qarýly kúshter komıtetiniń burynǵy tóraǵasy jáne demokrattardyń osy komıtettegi qazirgi kóshbasshysy Adam Smıt uıymdastyrdy. 

Adam Smıt AQSh pen Qytaıdyń «azyraq sóılesip jatqanyna» «qatty alańdaıtynyn» habarlady. 

Bul sapar Qytaı, Reseı jáne Soltústik Koreıa kóshbasshylary Tıananmen alańynda kezdesip, áskerı paradty tamashalaǵannan keıin birneshe apta ótken soń, Vashınton men Beıjiń arasyndaǵy saıası jáne ekonomıkalyq shıelenis kezinde boldy. 

Qazirgi kezde eki el saýda kelisimi boıynsha kelissóz júrgizip jatyr. AQSh prezıdenti qos taraptyń kelisimge kelýge kóbirek ýaqyty bolýy úshin qytaılyq tarıfter merzimin 10 qarashaǵa deıin uzartty.

Shilde aıynda AQSh pen Qytaı tarıftik kelisimdi taǵy úsh aıǵa uzartqanyn jazǵan bolatynbyz. Tıisti kelisim 28-29 shilde kúnderi Stokgolmde ótken eki kúndik kelissózder nátıjesinde qabyldandy.