AQSh Ókilder palatasy Iranmen soǵysty toqtatý týraly qarardy maquldady
ASTANA. KAZINFORM — AQSh Ókilder palatasy beısenbi kúni prezıdent Donald Tramptyń ustanymyna qarsylyq bildirip, amerıkalyq áskerdi Iranmen aradaǵy qaqtyǵys aımaǵynan shyǵarý týraly qarardy qabyldady, dep habarlaıdy NPR.
Daýys berý nátıjesi Kongreste soǵysqa qatysty alańdaýshylyqtyń kúsheıip, zań shyǵarýshylardyń óz baqylaý ókiletin belsendirek júzege asyrýǵa umtylyp otyrǵanyn kórsetti.
Qarar Ókilder palatasynda 214 depýtattyń qoldaýymen qabyldanyp, 208 depýtat qarsy daýys berdi. Qujattyń zańdyq kúshi bolmasa da, ol zań shyǵarýshylardyń prezıdent Tramptyń soǵysqa qatysty sheshimine sımvolıkalyq túrde qarsylyq bildirgenin ańǵartady. Bul — Ókilder palatasy soǵys bastalǵaly beri qabyldaǵan ekinshi qarar.
Bul sharany maquldaý úshin demokrattarǵa tórt respýblıkashyl: Mıchıgannan Tom Barrett, Pensılvanııadan Braıan Fıtspatrık, Ogaıodan — Ýorren Devıdson jáne Kentýkkıden Tomas Messı qosyldy.
Ókilder palatasyndaǵy daýys berýden keıin kóp uzamaı Senattaǵy demokrattar da soǵys ókiletine qatysty óz qararyn qabyldatýǵa árekettendi. Alaıda qujat jetkilikti qoldaý tappaı, 47 depýtat qoldap, 49-y qarsy daýys berdi.
Daýys berý Iran men AQSh arasyndaǵy shıelenis kúsheıgen kezeńde ótti. Aqpan aıynda qaqtyǵys bastalǵaly beri 18 amerıkalyq áskerı qyzmetker qaza tapqan. Pentagonnyń málimetinshe, shamamen 500 amerıkalyq áskerı jaraqat alǵan.
Osyǵan deıin Irannyń osy aıdaǵy áýe shabýyldarynan amerıkalyq qansha sarbaz jaraqat alǵanyn jazdyq.
