AQSh ókilderi Berlındegi eki kúndik kelissóz qorytyndysy boıynsha málimdeme jasady

ASTANA. KAZINFORM — Berlındegi kelissózderge AQSh-tyń arnaıy ókili Stıv Ýıtkoff pen Djared Kýshner bastaǵan AQSh delegatsııasy, Ýkraına prezıdenti Vladımır Zelenskıı jáne eýropalyq sheneýnikter qatysty, dep habarlaıdy VVS.

Berlındegi kelissózder barysynda AQSh delegatsııasy Ýkraına prezıdenti Vladımır Zelenskıımen jáne eýropalyq sheneýniktermen birlesip, NATO Jarǵysynyń 5-babyna uqsas qaýipsizdik kepildikteri paketin ázirledi. Bul týraly brıfıngte jýrnalısterge aty-jónin jarııalamaýdy suraǵan eki amerıkalyq sheneýnik málimdedi.

NATO Jarǵysynyń 5-baby ujymdyq qorǵanys qaǵıdatyn bekitedi, oǵan sáıkes alıanstyń bir múshesine jasalǵan qarýly shabýyl barlyq múshesine jasalǵan shabýyl retinde qarastyrylady.

— Bul kelisimniń negizinde máni jaǵynan 5-bapqa uqsas asa myqty kepildikter jatyr, sondaı-aq óte qýatty tejeý tetikteri qarastyrylǵan. Olar Ýkraına armııasynyń sanyna jáne onyń ıeligindegi qarý-jaraqqa qatysty, — dedi derekkózderdiń biri.

Sheneýniktiń aıtýynsha, bul usynys kelissózder ústelinde «máńgi» saqtalyp turmaıdy. Alaıda qujattyń naqty mazmuny jarııa etilmedi. Soǵan qaramastan, derekkózderdiń biriniń aıtýynsha, AQSh óz usynystarynda «mundaı jaǵdaıda múmkin bolǵan eń shekti deńgeıge deıin bardy».

Sheneýnikterdiń biri Reseı Ýkraına «kúshti ári erkin» bolýyna múmkindik beretin josparmen kelisetinine senimdi ekenin aıtty. Al ekinshisi kelissózder barysyna kóńili tolǵan AQSh prezıdenti Donald Tramp Reseı tarapyn NATO-nyń 5-babyna uqsas kepildiktermen kelisýge kóndire alatynyna senetinin jetkizdi.

Derekkózderdiń aıtýynsha, kezdesýde Ýkraına aýmaqtaryna qatysty másele, atap aıtqanda Reseı talap qoıyp otyrǵan Donbass óńiriniń keıbir bólikteri jan-jaqty talqylanǵan.

— Aqyr sońynda, eger osy parametrler naqty aıqyndalsa, qalǵan egemendikke qatysty máseleler taraptardyń ózara kelisýine baılanysty bolady, — dedi sheneýnikterdiń biri.

Onyń aıtýynsha, Tramp bul máselede Ýkraınaǵa «qysym jasaýdy» josparlap otyrǵan joq jáne Kıev óz aýmaqtary jóninde sheshimdi óz betinshe qabyldaıdy.

Kezdesý barysynda Ýkraınany ekonomıkalyq jaǵynan qoldaý máselesi — eldi «qalpyna keltirý jáne órkendeý paketi» de talqylandy. Sondaı-aq Zaporoje atom elektr stantsııasynyń bolashaǵy jóninde sóz boldy.

— Qýattardy 50/50 qaǵıdaty boıynsha bólý jóninde jalpy kelisimge jaqyndaǵan sııaqtymyz, — dedi sheneýnik.

Eske sala keteıik, keshe Vladımır Zelenskıı men AQSh delegatsııasy arasyndaǵy kelissózder bes saǵattan astam ýaqytqa sozylǵan bolatyn.