AQSh ókili: Lıvandaǵy bitimgerlik mıssııa - Qazaqstan tarapynan jasalǵan mańyzdy qadam
ASTANA. QazAqparat - Lıvandaǵy bitimgerlik mıssııa - Qazaqstan tarapynan jasalǵan mańyzdy qadam bolyp tabylady. AQSh Memlekettik hatshysynyń Ońtústik jáne Ortalyq Azııa isteri jónindegi kómekshisiniń birinshi orynbasary Elıs Ýells búgin Astanada osyndaı pikir bildirdi, dep habarlaıdy «QazAqparat» HAA tilshisi.
«Qazaqstan Ortalyq Azııa elderiniń arasynda beıbit bastamalarǵa qatysqan birinshi memleket bolǵanyn kórdik. Sonyń ishinde, bul Lıvandaǵy bastamaǵa qatysty. Bul Qazaqstan tarapynan jasalǵan óte mańyzdy qadam, ol sizdiń memleketińizdiń kóshbasshylyq rólin taǵy bir kórsetip otyr», - dedi Elıs Ýells Qazaqstan-Amerıka keńeıtilgen strategııalyq seriktestik jónindegi komıssııanyń kezektegi otyrysynyń qorytyndysyna arnalǵan brıfıngte.
Eske sala keteıik, aǵymdaǵy jyldyń qazan aıynda 120-dan astam qazaqstandyq áskerı Lıvanǵa bitimgerlik mıssııamen attandy. Budan basqa, Elıs Ýells Qazaqstannyń qaýipsizdikti qamtamasyz etý, lańkestikpen kúres, sondaı-aq Aýǵanstanǵa kómek kórsetýdegi turaqty saıasatyn atap ótti.
Avtory Kamıla Ámirova
