AQSh ókilderi Qazaqstannyń áıel quqyǵyn qorǵaý baǵytyndaǵy jetistikterin joǵary baǵalady
Sapar aıasynda Áıelderdiń jahandyq máseleleri jónindegi AQSh Memlekettik hatshysy keńsesiniń aǵa óńirlik dırektory Bet Smıtpen, USAID Ákimshiligi Keńsesiniń genderlik máseleler jónindegi aǵa úılestirýshisi Djamıl Bıdjıo, Dúnıejúzilik banktiń genderlik máseleler jónindegi Jahandyq dırektory Hana Brıksımen jáne IFC Genderlik máseleler jáne ekonomıkalyq ınklıýzıvtilik jónindegi toptyń basshysy Genrıetta Kolbpen kezdesýler ótti, dep habarlaıdy QazAqparat QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasyna silteme jasap.
Amerıkalyq áriptesterge Qazaqstandaǵy áıelderdiń quqyqtaryn kúsheıtý salasyndaǵy progrestiń jáne olardyń múmkindikterin keńeıtý jónindegi bastamalardyń negizgi aspektileri jetkizildi .
Taraptar óńirlik áıelder kásipkerligin qoldaý ortalyqtary men otbasyn qoldaý ortalyqtaryn damytý máseleleri boıynsha yntymaqtastyq múmkindikterin talqylady. Áıelderge arnalǵan bilim berý baǵdarlamalary salasynda ózara is-qımyl jasaý jáne áıelderge qatysty turmystyq zorlyq-zombylyqty joıý máseleleri boıynsha dıalogty kúsheıtý boıynsha ýaǵdalastyqqa qol jetkizildi.
Amerıkalyq tarap Qazaqstannyń jetistikterin joǵary baǵalap, áıelderdiń quqyqtary men múmkindikterin kúsheıtý salasynda strategııalyq áriptestikti jalǵastyrý nıetin rastady.
Sonymen qatar osy jyldyń 17 naýryzynda BUU Áıelder jaǵdaıy jónindegi komıssııasynyń 66-sessııasynyń jumysy sheńberinde Ulttyq komıssııa Túrki memleketteri uıymynyń Kásipker áıelder komıtetimen áriptestikte Qazaqstandaǵy «BUU-Əıelder» qurylymynyń qoldaýymen «Áıelderdiń turaqty damý maqsattaryn iske asyrýdaǵy ekologııalyq bastamalary» atty is-shara ótkizdi.
Dóńgelek ústel jumysyna Qazaqstan Respýblıkasynyń BUU janyndaǵy Turaqty ókili Maǵjan Іlııasov, BUU-Əıelder kásipkerligi jónindegi úılestirýshisi Meral Gýzel, sondaı-aq Qazaqstan, Ázerbaıjan, Túrkııa, Qyrǵyzstan jáne Vengrııa ókilderi qatysty.
Lazzat Ramazanova kezdesýde atap ótkendeı, Qazaqstan klımattyń ózgerýi salasyndaǵy jahandyq kún tártibin iske asyrýda. Elimizde úsh júzge jýyq úkimettik emes uıymdar genderlik problemalarmen, sonyń ishinde ekologııa máselelerimen aınalysady. Aýyldaǵy áıelderdiń júzege asyryp jatqan jobalary, atap aıtqanda, ekologııalyq qaýipsiz aýyl sharýashylyǵy ónimderin ósirý boıynsha jobalary belsendi qoldaý tabýda.
Sondaı-aq, Lazzat Ramazanova qazirgi jáne bolashaq urpaqtyń múddesi úshin qorshaǵan ortany qorǵaý, tabıǵı resýrstardy utymdy paıdalaný jáne saqtaý boıynsha jahandyq mindetterge qol jetkizýde elder kúsh-jigerin biriktirý qajettigin atap ótti.
Áıelder jaǵdaıy jónindegi komıssııanyń 66 sessııasynda qabyldanǵan sheshimder basty maqsatqa – ekologııalyq mádenıetti arttyratyn, tabıǵatqa uqypty qaraýǵa jáne «jasyl ekonomıkany» damytýǵa yqpal etetin sheshimder qabyldaýǵa áıelderdiń mándi jáne tıimdi qatysýyn qamtamasyz etýge sebepshi bolady dep úmittenemin», - dep atap ótti Lazzat Ramazanova.
Budan basqa, Nıý-Iorkte Ulttyq komıssııa tóraǵasy BUU-Əıelder qurylymynyń Atqarýshy dırektory Sıma Bahýspen strategııalyq seriktestik jáne Qazaqstandaǵy áıelder men qyzdardyń quqyqtary men múmkindikterin keńeıtý jobalaryn iske asyrý máseleleri boıynsha kezdesý ótkizdi.
