AQSh odaqtastary Sırııada sodyrlar otyrǵan túrmeni baqylaýdan aıyrdy

ASTANA. KAZINFORM – Kúrdter jetekshilik etetin Sırııa demokratııalyq kúshteri (SDK) myńdaǵan «Islam memleketi» lańkestik tobynyń (Qazaqstanda tyıym salynǵan uıym – red.) músheleri qamalǵan kúzettegi túrmeni baqylaýdan aıyrǵanyn málimdedi, dep habarlaıdy NBC News.

SDK – Sırııadaǵy AQSh-tyń negizgi odaqtasy – Sırııa úkimetimen baılanysy bar kúshtermen qaqtyǵysqa túsken. Birneshe márte AQSh bastaǵan koalıtsııadan kómek suralǵanyna qaramastan, koalıtsııa qaqtyǵysqa aralaspaǵan.

Nátıjesinde SDK Hasaka provıntsııasynda ornalasqan ál-Shaddadı túrmesin baqylaýdan aıyrdy. Bul túrmede «Islam memleketi» tobynyń sodyrlary otyrǵan. SDK málimetinshe, Damask úkimetimen baılanysty qarýly toptardyń birneshe márte shabýylynan keıin atalǵan túrme uıymnyń baqylaýynan shyqqan.

Sondaı-aq Sırııa demokratııalyq kúshteriniń jasaqtary Rakka qalasynyń shetinde ornalasqan ál-Aktan túrmesi mańynda da shabýylǵa ushyraǵan.

Al Sırııa armııasy Sırııa demokratııalyq kúshterin ál-Shaddadı túrmesinen DAISh sodyrlaryn bosatty dep aıyptady.

Qarýly qaqtyǵystar Sırııa úkimeti men SDK arasynda ıntegratsııa týraly kelisimge qol qoıylǵannan keıingi kúni bastalǵan. Bul kelisim avtonomdy aımaqtyń basym bóligin úkimet baqylaýyna berýdi kózdegen. Sondaı-aq «Islam memleketi» sodyrlary otyrǵan túrmelerge jaýapkershilikti Sırııa úkimetine tapsyrý josparlanǵan bolatyn.

Buǵan deıin Sırııa úkimeti men kúrdter atysty toqtatý týraly kelisimge qol qoıǵany habarlandy.