AQSh Nıgerııada DAISh sodyrlaryna soqqy berdi – Tramptyń málimdemesi

ASTANA. KAZINFORM — AQSh áskerı kúshteri Nıgerııa aýmaǵynda «Islam memleketi» lańkestik uıymynyń (DAISh – Qazaqstan Respýblıkasynda tyıym salynǵan uıym – red.) sodyrlaryna soqqy jasady. Bul týraly TASS jazdy.

Bul jóninde AQSh prezıdenti Donald Tramp málimdedi. Onyń aıtýynsha, operatsııa onyń tikeleı buıryǵymen júrgizilgen jáne eldiń soltústik-batys bóliginde negizinen hrıstıan dinin ustanatyn beıbit turǵyndardy óltirip kelgen terrorısterge «qýatty ári joıqyn soqqy» jasalǵan.

— Búgin keshke AQSh Qarýly kúshteriniń bas qolbasshysy retinde meniń buıryǵymmen Nıgerııanyń soltústik-batysynda negizinen kinásiz hrıstıandardy sońǵy kóptegen jyldarda, tipti ǵasyrlar boıy bolmaǵan aýqymda asa qatygezdikpen óltirgen DAISh (Qazaqstanda tyıym salynǵan – red.) sodyrlarynyń aramzalaryna qýatty ári ólimge ákeletin soqqy jasaldy. Buǵan deıin men bul terrorısterge hrıstıandardy óltirýdi toqtatpasa, aýyr jazaǵa tartylatynyn eskertken edim, mine, búgin keshke sol eskertý iske asty, — dep jazdy ol Truth Social áleýmettik jelisinde.

Pentagon basshysy Pıt Hegset Nıgerııa bıligine yntymaqtastyq úshin alǵys bildirip, «operatsııalardy jalǵastyrý múmkin» ekenin aıtty, alaıda egjeı-tegjeıin ashpady. AQSh Qarýly kúshteriniń Afrıka qolbasshylyǵy (AFRICOM) shabýyldyń «Nıgerııa bıliginiń ótinishi boıynsha» júzege asyrylǵanyn jáne onyń nátıjesinde DAISh-tyń (Qazaqstanda tyıym salynǵan – red.) birneshe sodyry joıylǵanyn rastady.

Buǵan deıin, 1 qarashada, Tramp Pentagonǵa Nıgerııadaǵy hrıstıandardy ıslamshyl terrorısterden qorǵaý sharalaryn ázirleýdi tapsyrǵan edi. Al Nıgerııa bıligi dinı tózimsizdik jónindegi aıyptaýlardy joqqa shyǵaryp, elde barlyq azamattar úshin dinı senim bostandyǵyn qamtamasyz etý baǵytynda jumystar júrgizilip jatqanyn atap ótti.

Eske salaıyq, AQSh Memlekettik departamenti 29 eldegi AQSh elshilerine olardyń ókilettikteriniń aıaqtalǵany týraly hat joldaǵan. Bul dıplomattardyń basym bóligi Djo Baıdenniń prezıdenttigi kezeńinde taǵaıyndalǵan.