AQSh «NATO 3.0» tujyrymdamasyna kóshýdi usyndy
ASTANA. KAZINFORM – AQSh Eýropadaǵy amerıkalyq áskerlerdiń bolashaqtaǵy ornalasýyn taldaý maqsatynda arnaıy sholýdy bastady. Bul týraly Brıýsselde ótken NATO elderiniń qorǵanys mınıstrleri kezdesýinde Pentagon basshysy Pıt Hegset málimdedi, dep habarlaıdy Anadolý.
Onyń aıtýynsha, AQSh odaqtastarymen birge qyrǵı-qabaq soǵys aıaqtalǵannan keıingi qaýipsizdik salasyndaǵy ózgeristerdi eskeretin «NATO 3.0» tujyrymdamasyn ázirleý baǵytynda jumys júrgizip jatyr.
Pıt Hegsettiń sózinshe, bul tekserý Soltústik Atlantıka alıansynyń Eýropadaǵy jetekshi rólin nyǵaıtýǵa, óńir qorǵanysy úshin bloktyń jaýapkershiligin arttyrýǵa jáne AQSh kúshteriniń jahandyq qajettilikterge sáıkestigin qamtamasyz etýge baǵyttalǵan.
Ol sondaı-aq Eýropadaǵy amerıkalyq áskerı kúshter men bazalardyń ornalasýyn qaıta qaraý protsesi alty aıǵa deıin sozylatynyn aıtty.
Sonymen qatar AQSh qorǵanys mınıstri Vashıngtonnyń keıbir odaqtastary bul tekserýden óte almaıtynyna senimdi ekenin jetkizdi.
Eske sala ketsek, AQSh pen Iran aldyn ala beıbit kelisimge qol qoıǵanyn jazdyq. Al osy kelisimnen keıin álemdik munaı baǵasy tómendedi.
