AQSh munaı óndirýden Reseı men Saýd Arabııasyn alǵash ret basyp ozdy
ASTANA. QazAqparat - 2014 jyldyń alǵashqy jartyjyldyǵynyń qorytyndysy boıynsha AQSh Reseı men Saýd Arabııasyn munaı óndirý boıynsha basyp ozdy, dep habarlaıdy ITAR-TASS agenttigi.
Atap aıtqanda, AQSh aǵymdaǵy jydyń alǵashqy toqsanynda táýligine 11 mln barrel munaı óndirgen. Salystyrmaly túrde alǵanda Reseıdiń táýliktik munaı óndirisi shamamen 10,53 mln barrel, al Saýd Arabııasynyń munaıy 9,45 mln barreldi quraıdy. Bank of America sarapshylarynyń sózine qaraǵanda, AQSh slantsty gaz ken oryndaryn belsendi túrde ıgerý esebinen munaı óndirýdi arttyryp otyr.
«Amerıka endigide munaı men gazdy óndiretin álemdik kóshbasshyǵa aınaldy. Energotasymaldaýshylar baǵasynyń tómendigi amerıkalyq ekonomıkanyń basymdyǵy bolyp tabylady», - delingen agenttik habarlamasynda.
Keltirilgen málimetterge qaraǵanda, AQSh-tyń Tehas pen Soltústik Dakote qaırańdaryndaǵy munaı óndirisi de aıtarlyqtaı artqan. Bul negizinen jaqparly jynystardaǵy munaıdy joǵary qysymmen alý tehnologııasynyń esebinen týyp otyr.
Toqtala ketetin jaıt, AQSh munaıdy óndirýmen qatar, álemdegi ony eń kóp tutynatyn el bolyp qalýda. Máselen AQSh energetıka mınıstrliginiń sáýir aıyndaǵy málimetine qaraǵanda, munaı ımporty kúnine ortasha alǵanda 7,5 mln barreldi quraǵan. Al Halyqaralyq energetıka agenttiginiń boljamy boıynsha AQSh-ta munaı óndirý kórsetkishi 2019 jylǵa qaraı kúnine 13,1 mln. barrelge jetýi múmkin.
