AQSh: «Mılton» daýyly jaqyndaýyna baılanysty Florıdanyń 35 okrýginde tótenshe jaǵdaı jarııalandy

ASTANA.KAZINFORM - AQSh-tyń Florıda shtatynyń 35 okrýginde «Mılton» tropıkalyq daýyly jaqyndaýyna baılanysty tótenshe jaǵdaı jarııalandy. Bul týraly aımaq gýbernatory Ron Desantıstiń keńsesi habar taratty, dep jazady RIA Novostı.

«Florıda gýbernatory Ron Desantıs daýyl aldynda Florıdanyń 35 okrýginde tótenshe jaǵdaı jarııalady», - delingen habarlamada.

Buǵan deıin AQSh-tyń Ulttyq daýyl ortalyǵy (NHC) tropıkalyq «Mılton» daýyly Meksıka shyǵanaǵynda soǵyp, kelesi aptanyń ortasynda AQSh-tyń Florıda shtatyna jetýi múmkin ekenin habarlaǵan.

CNN telearnasy qyrkúıekte AQSh-tyń ońtústik-shyǵysynda bolǵan «Helen» daýyly qurbandarynyń sany kem degende 227 adamǵa jetkenin habarlady.

AQSh ishki qaýipsizdik mınıstri Alehandro Maıorkas Tótenshe jaǵdaılardy basqarý agenttiginde (FEMA) daýyl maýsymynyń qalǵan bóligindegi daýyl saldarymen kúresýge qarajat jetkiliksiz ekenin aıtty.