AQSh memlekettik mekemelerine DeepSeek qoldanýǵa tyıym saldy
ASTANA. KAZINFORM — AQSh Іshki qaýipsizdik mınıstrligi azamattyq memlekettik mekemelerge qytaılyq DeepSeek platformasyn jáne onyń negizinde ázirlengen barlyq servısti memlekettik júıelerden alyp tastaýdy tapsyrdy. Bul týraly Kazinform agenttiginiń Vashıngtondaǵy menshikti tilshisi Decrypt basylymyna silteme jasap habarlady.
AQSh Іshki qaýipsizdik mınıstrliginiń málimetinshe, bul modelder birneshe baǵyt boıynsha qaýip tóndiredi. Memlekettik qyzmetshiler men merdigerler olardy paıdalansa, qupııa derekter Qytaıǵa ótip ketýi múmkin. Buǵan qosa, atalǵan servıster AQSh azamattary men memlekettik mekemeler týraly jedel barlaý málimetterin jınaýǵa jol ashýy yqtımal.
Shekteý DeepSeek qosymshasyna ǵana emes, onyń tehnologııalary negizinde jasalǵan úshinshi tarap servısterine de qatysty.
Bul sheshim AQSh-ta Qytaı tehnologııalaryn shekteýge baǵyttalǵan federaldyq deńgeıdegi aýqymdy naýqan aıasynda qabyldandy. 29 qazanda AQSh Federaldyq baılanys komıssııasy (FCC) amerıkalyq elektronıkany Qytaı zerthanalarynda synaýǵa tyıym salý máselesin daýysqa salady.
Eske salaıyq, buǵan deıin Qytaıdyń jasandy ıntellekt ázirleýshisi DeepSeek alǵashqy ınvestıtsııalyq raýnd aıasynda $7,4 mlrd-tan astam qarjy tartqanyn habarlaǵan edik. Mámileden keıin kompanııanyń quny $50 mlrd-tan asyp, ony Qytaıdaǵy eń qymbat jasandy ıntellekt startapyna aınaldyrdy.
