AQSh memlekettik qyzmetterge arnalǵan biryńǵaı onlaın-platforma qurady
ASTANA. KAZINFORM – AQSh prezıdenti Donald Tramp federaldyq aqparat pen memlekettik qyzmetterdi onlaın alýǵa múmkindik beretin biryńǵaı tsıfrlyq America.gov portalyn qurý týraly jarlyqqa qol qoıdy. Atalǵan qujat Aq úıdiń saıtynda jarııalandy.
Jańa portal azamattardyń federaldyq memlekettik organdarmen ózara baılanysyn jeńildetýge tıis. Paıdalanýshylar qajetti qyzmetti ár memlekettik organnyń jeke saıttarynan izdemeı-aq, America.gov portalynan taba alady. Munda júıege kirip, qajetti aqparatty alýǵa, sondaı-aq tıisti qyzmet onlaın túrde qoljetimdi bolsa, ony sol jerden rásimdeýge bolady.
Portalǵa kirý úshin federaldyq memlekettik organdar paıdalanýshylardyń jeke basyna qatysty málimetterdi rastaýǵa qoldanatyn Login.gov júıesi engiziledi.
Atalǵan júıege jyl saıyn 100 myńnan astam adam paıdalanatyn ári onlaın túrde qoljetimdi federaldyq memlekettik qyzmetter engiziledi. Alaıda buǵan AQSh-tyń Salyq qyzmeti usynatyn salyq deklaratsııalaryn tapsyrý qyzmetteri, sondaı-aq Qorǵanys mınıstrligi men amerıkalyq barlaý qaýymdastyǵynyń qyzmetteri kirmeıdi.
Jarlyqta memlekettik tsıfrlyq qyzmetterdiń sapasyna, qoljetimdiligine, qaýipsizdigine jáne paıdalanýǵa yńǵaılylyǵyna qoıylatyn biryńǵaı talaptar da belgilengen. Bılik jeke derekterdi jınaýdy barynsha azaıtyp, paıdalanýshylardyń jeke basyna qatysty málimetterdi rastaýdyń qaýipsiz júıesin qamtamasyz etýdi kózdeıdi.
Sonymen qatar federaldyq memlekettik organdar óz júıelerine, qujattary men ókilettikterine baqylaýdy saqtap qalady. America.gov portaly iske qosylǵanymen, azamattar týraly biryńǵaı ortalyqtandyrylǵan derekter bazasy qurylmaıdy.
Amerıkalyqtar memlekettik qyzmetterdi burynǵydaı basqa da joldarmen – memlekettik mekemelerge jeke baryp, telefon arqyly, poshta arqyly nemese tıisti vedomstvolardyń arnaıy saıttary arqyly ala alady. America.gov portaly azamattardyń memleketpen baılanysýynyń jalǵyz tetigi emes, memlekettik qyzmetterge qol jetkizýdiń qosymsha ári yńǵaıly quralyna aınalmaq.
Jarlyqqa qol qoıylǵannan keıingi 90 kún ishinde AQSh-tyń Basqarý jáne bıýdjet basqarmasy federaldyq vedomstvolarǵa arnalǵan nusqaýlyq daıyndaýǵa tıis. Odan keıin vedomstvolar portalǵa engiziletin qyzmetterdi anyqtap, olardy qaýipsizdik pen qupııalylyq talaptaryna saı America.gov júıesine qosady.
Memlekettik organdar portalǵa qosylǵan qyzmetterdiń qoldanylýy men tıimdiligi týraly málimetterdi de turaqty túrde usynyp otyrýǵa mindetti bolady.
Jarlyq qoldanystaǵy zańnamaǵa sáıkes ári qajetti qarjy bólingen jaǵdaıda júzege asyrylady.
Buǵan deıin AQSh-tyń Ortalyq Azııa elderine kıberqaýipsizdikti damytýǵa 5 mıllıon dollar bólgeni habarlanǵan bolatyn.
