AQSh memlekettik hatshysy Saýd Arabııasyna bardy
ASTANA. KAZINFORM – AQSh memlekettik hatshysy Marko Rýbıo Saýd Arabııasyna bardy. Amerıka dıplomatııasynyń basshysy Ýkraınadaǵy soǵysty toqtatý kelissózderi úshin reseılik resmı tulǵalarmen kezdespek, dep habarlaıdy Kazinform agenttigi Amerıka daýysyna silteme jasap.
Buǵan deıin Marko Rýbıo eýropalyq elderdiń Vashıngton men Máskeý arasyndaǵy bastapqy kelissózderden tys qalý yqtımaldyǵyna qatysty alańdaýshylyǵyn seıiltýge tyrysqan bolatyn. Ol CBS telekompanııasyna bergen suhbatynda Ýkraınaǵa qatysty baıypty kelissózder protsesiniń bastalmaǵanyn atap ótedi. Atalǵan kelissóz ilgerilegen jaǵdaıda oǵan Ýkraına men Eýropanyń mindetti túrde qatysatynyn basa aıtady. Munan bólek, AQSh memlekettik hatshysy Ýkraınadaǵy soǵysty toqtatý týraly barynsha jan-jaqty kelissózder úshin jaǵdaı jasaýǵa umtylatyndyǵyna nazar aýdartady.
Búgin Rýbıo joǵary laýazymdy saýdııalyq kóshbasshylarmen kezdesedi dep josparlanǵan. Sonymen qatar Saýd Arabııasynyń murager hanzadasy Muhammed bın Salmanmen de kezdesýi yqtımal.
Ýkraına prezıdenti Vladımır Zelenskıı de atalǵan óńirde saparmen júr. Demalys kúni Birikken Arab Ámirlikterine kelgen Zelenskıı Saýd Arabııasy men Túrkııaǵa saparlaýǵa nıetti ekendigin aıtqan. Biraq, sapar merzimi ázirshe belgisiz. Munan bólek, ol reseılik nemese amerıkalyq resmı tulǵalarmen kezdesýdi josparlap otyrmaǵanyn atap ótken.
AQSh delegatsııasy Reseımen kelissóz júrgizý úshin Saýd Arabııasyna attanǵanyn jazǵan bolatynbyz.