AQSh Memlekettik hatshysy Panamaǵa saparlaıdy
ASTANA. KAZINFORM — Memlekettik hatshy Marko Rýbıo kelesi aptada Panamaǵa barady. Bul týraly Kazinform agenttiginiń menshikti tilshisi habarlaıdy.
AQSh syrtqysaıası vedomstvosynyń basshysy sondaı-aq Gvatemala, Salvador, Kosta-Rıka jáne Domınıkan Respýblıkasyna barýdy kózdep otyr.
Panamaǵa barǵan alǵashqy sapary kezinde Rýbıo AQSh syrtqy saıasatynyń ortalyǵynda kem degende eki máseleni talqylamaq: zańsyz ımmıgratsııany azaıtý jáne Donald Tramptyń Panama kanalyn qaıtarýǵa degen umtylysy, dep jazdy Politico.
Budan buryn habarlanǵandaı, Panama basshylyǵy BUU Bas hatshysy Antonıý Gýterrıshke hat joldap, onda AQSh prezıdenti Donald Tramptyń Panama kanalynyń kimge tıesili máselesi jáne ony Qurama Shtattar baqylaýyna qaıtarý nıetine qatysty málimdemelerin qabyldamaıtynyn bildirdi.
— Bizdiń kanalymyzdyń egemendigi kelissózderge jatpaıdy jáne ol — bizdiń kúres tarıhymyzdyń bir bóligi, — dedi Syrtqy ister mınıstri Haver Martınes-Acha.
Ol prezıdent Hose Raýl Mýlıno óz ustanymyn anyq bildirgenin qosyp ótti. Rýbıo barýdy josparlap otyrǵan basqa elder, sonyń ishinde Gvatemala men Salvador da AQSh-tyń ońtústik shekarasyna jetýge tyrysatyn mıgranttar úshin negizgi tranzıttik pýnkt boldy.