Marko Rýbıo óz vedomstvosyn qaıta jasaqtaıtynyn málimdedi

ASTANA.KAZINFORM — AQSh Memlekettik hatshysy Marko Rýbıo óz vedomstvosyn qaıta jasaqtaıtynyn, sonyń nátıjesinde Memlekettik departamenttiń kóptegen halyqaralyq baǵdarlamalary toqtatylyp, onyń qyzmetkerleriniń edáýir bóligi jumystan bosatylatynyn málimdedi, dep jazdy BBC.

Vedomstvony «buzylǵan, bıýrokratııalyq» jáne «radıkaldy saıası ıdeologııaǵa beıim» dep sıpattaǵan Rýbıo, «AQSh-tyń negizgi ulttyq múddelerine sáıkes kelmeıtin» áreketterdiń qysqartylatynyn aıtty.

Atap aıtqanda, Memlekettik hatshy adam quqyqtarynyń buzylýyn, áskerı qylmystar men genotsıdti baqylaýmen aınalysatyn bólimdi taratý josparlanyp otyrǵanyn naqtylady.

Memlekettik departamentti qaıta qurý josparyn Rýbıo seısenbi kúni jańa qurylymdyq shemany usynyp, ony qysqasha resmı málimdememen jáne Substack-taǵy tolyǵyraq jarııalanymmen tanystyrdy.

Apnews agenttiginiń habarlaýynsha, qaıta qurý sondaı-aq sheteldik jáne gýmanıtarlyq ister jónindegi jańa keńseniń qurylýyn qamtıdy, ol USAID agenttigi taratylǵannan keıin qalǵan kómek baǵdarlamalaryn qadaǵalaıtyn bolady. Afrıka isteri men bosqyndar máselelerimen aınalysatyn keńseler saqtalady, al áıelder quqyqtary men ártúrlilikke qatysty keńseler, boljam boıynsha, qysqartylýy múmkin. Bul jospar Memlekettik departament qyzmetkerleri men zań shyǵarýshylar arasynda, ásirese sheteldegi dıplomatııalyq belsendi uıymdardy alańdatyp otyr. 

Demokrattar qaıta jasaqtaý AQSh-tyń jahandyq kóshbasshylyǵy men qaýipsizdigine nuqsan keltirýi múmkin dep alańdaýshylyq bildirdi, al keıbir respýblıkalyqtar bul bastamany el múddesine sáıkes keledi dep qoldady.

Eske sala keteıik, buǵan deıin Marko Rýbıo AQSh Ýkraınadaǵy jaǵdaıdy retteý jumystaryn toqtatýy múmkin ekenin aıtqan bolatyn.