AQSh Memlekettik hatshysy Londondaǵy Ýkraına boıynsha kelissózge qatyspaıdy

ASTANA. KAZINFORM – AQSh Memlekettik hatshysy Marko Rýbıo sársenbi kúni Ýkraınadaǵy qaqtyǵysty retteý boıynsha kelissózge qatysý úshin Londonǵa barmaıdy, dep málimdedi Memlekettik departamenttiń baspasóz qyzmetiniń jetekshisi Temmı Brıýs, dep jazdy TASS aqparat agenttigi.

- Memlekettik hatshy Rýbıo – jumysbasty adam. Ol bizde bolǵan eń belsendi Memlekettik hatshylardyń biri jáne bul onyń ómiriniń árbir kúnine áser etetini sózsiz. Sondyqtan belgili bir josparlar bolǵan kezde, olar shartty bolatynyn bilesizder. Al bul jaǵdaıda Londondaǵy kezdesýler jalǵasyp jatqanda ol kelissózge qatyspaıdy, - dep atap ótti dıplomat.

Ol Ulybrıtanııa astanasyndaǵy kelissózge Vashıngtonnyń Vladımır Zelenskıımen jáne Ýkraına basshylyǵymen baılanysyn qadaǵalaıtyn Ýkraına boıynsha arnaıy ókil Kıt Kellogtyń qatysatynyn qosyp ótti.

- Iá, onda general (otstavkadaǵy) Kellog bar jáne bul áńgimelerdi ol júrgizedi. Sondyqtan biz Londonnan jaqsy habar kútemiz, - dedi Brıýs.

Baspasóz qyzmetiniń jetekshisi Vashıngtonnyń Ýkraınadaǵy qaqtyǵysty áskerı emes, dıplomatııalyq jolmen sheshýdi qalaıtynyn rastady.

Kelissózge sondaı-aq Ulybrıtanııa, Frantsııa jáne Kıev bıliginiń ókilderi qatysady.

Buǵan deıin AQSh Memlekettik hatshysy Marko Rýbıo AQSh Ýkraınadaǵy jaǵdaıdy retteý jumystaryn toqtatýy múmkin ekenin málimdegen.