AQSh Memlekettik departamentiniń delegatsııasy Venesýelaǵa bardy

ASTANA. KAZINFORM — Nıkolas Madýro bılikten shettetilgennen keıin alǵash ret AQSh Memlekettik departamentiniń delegatsııasy Venesýelaǵa bardy, dep habarlaıdy Kazinform agenttigi.

CNN málimetinshe, AQSh dıplomattary men Kolýmbııadaǵy Venesýela máseleleri boıynsha bólimniń qaýipsizdik qyzmetkerleri, sondaı-aq AQSh-tyń Kolýmbııadaǵy ýaqytsha elshisi Djon Maknamara Venesýela astanasyna barǵan. Delegatsııanyń maqsaty – «kezeń-kezeńimen qyzmetti qaıta bastaý múmkindigin aldyn ala baǵalaý».

Bul sapar AQSh-tyń Karakastaǵy elshiligin qaıta ashýǵa daıyndyǵy aıasynda jasalyp otyr jáne Tramp ákimshiliginiń elde dıplomatııalyq qatynasty qalpyna keltirý nıetin kórsetedi.

2019 jyly AQSh óz dıplomattaryn qaıtaryp, Karakastaǵy elshiliktiń jumysyn toqtatqan. Sol ýaqytta Nıkolas Madýro Venesýela elshilikterin jabyp, AQSh-taǵy dıplomattardy keri shaqyrǵan. AQSh-tyń Venesýela máseleleri boıynsha bólimi Kolýmbııa astanasyndaǵy elshilikte jumysyn jalǵastyryp otyr.

AQSh Memlekettik departamentiniń joǵary laýazymdy ókili dúısenbi kúni vedomstvo «prezıdent sheshim qabyldasa» elshiliktiń jumysyn qaıta bastaýǵa daıyn ekenin málimdedi.

Qazirgi ýaqytta AQSh dıplomattary men Venesýela ýaqytsha saıası basshylyǵy arasyndaǵy kezdesýler týraly kelissózder júrip jatyr, biraq joǵary laýazymdy amerıkandyq sheneýnik bul sapar kezinde kezdesýler ótpeıdi dep habarlady.

Juma kúni Venesýela Syrtqy ister mınıstrligi AQSh-pen «dıplomatııalyq zertteý protsesin» bastaǵanyn jarııalap, onyń maqsaty – eki eldegi dıplomatııalyq ókildikterdi qalpyna keltirý ekenin atap kórsetti.

Buǵan deıin AQSh prezıdenti Donald Tramp Venesýela oppozıtsııasynyń kóshbasshysy Marııa Machadomen kelesi aptada kezdesýdi josparlap otyrǵanyn málimdegen.