AQSh Memlekettik departamentinde 1000-nan astam adam jumystan shyǵaryldy

ASTANA. KAZINFORM — AQSh Memlekettik departamentiniń 1000-nan astam qyzmetkeri Tramp ákimshiliginiń federaldyq qyzmetkerler sanyn qysqartý jónindegi áreketteri aıasynda jumystan shyǵaryldy.

AZƏRTAC sheteldik BAQ-qa silteme jasap habarlaǵandaı, juma kúni Memlekettik departament qyzmetkerlerine jiberilgen habarlamaǵa sáıkes, májbúrli túrde qysqartýǵa azamattyq qyzmettegi 1107 jáne dıplomatııalyq qyzmettegi 246 qyzmetker ilikken.

Buǵan qosa, bıylǵy jyldyń basynda 1500-den astam qyzmetker federaldyq úkimetti keń kólemde qaıta uıymdastyrý aıasynda óz erkimen qyzmetinen ketken.

Synshylardyń aıtýynsha, bul jappaı qysqartý departamenttiń atqaratyn jumysyna keri áserin tıgizýi múmkin.

Memlekettik departamenttiń Halyq, bosqyndar jáne kóshi-qon isteri jónindegi bıýrosyndaǵy bosqyndardy qabyldaý bóliminiń memlekettik qyzmetkerleriniń basym bóligi qysqartýǵa ushyraǵan. Bul bólim AQSh-taǵy bosqyndardy qonystandyrý máselesimen aınalysady.

Sondaı-aq Aýǵan bosqyndaryn qonystandyrý boıynsha úılestirý jumystaryn júrgizetin Memlekettik departamenttiń CARE bóliminiń qyzmetkerleri de qysqartýǵa ilindi.

Bul qysqartýlar Joǵarǵy sot Tramp ákimshiliginiń federaldyq qyzmetkerler sanyn azaıtý josparyn júzege asyrýǵa bolady degen sheshim qabyldaǵannan birneshe kúnnen keıin oryn aldy.

Qyzmetkerler sanyn qysqartý — Prezıdent Donald Tramptyń memlekettik shyǵyndardy azaıtý jónindegi saılaýaldy ýádesine baılanysty qolǵa alynǵan shara.

Aıta ketelik AQSh 1 tamyzdan bastap EO men Meksıka taýarlaryna 30% kedendik baj salyǵyn engizedi.