AQSh Memlekettik departamenti jańa vızalyq shekteýlerdi jarııalady
ASTANA. KAZINFORM – AQSh ata-analardyń biri balasyn shetelge alyp ketkennen keıin ony elge qaıtarýǵa kedergi keltirgen sheteldik laýazymdy tulǵalar men ózge de adamdarǵa jáne olardyń jaqyn týystaryna vıza berýge shekteý qoıady, dep habarlaıdy Kazinform agenttigi.
AQSh Memlekettik departamentiniń málimetinshe, bul shekteýler shetel úkimetteriniń ókilderine, sýdıalarǵa, sot jáne quqyq qorǵaý organdarynyń qyzmetkerlerine de qatysty bolady. Atalǵan tulǵalar balalardy turaqty turatyn eline qaıtarýǵa baǵyttalǵan zańdar men sot sheshimderin qasaqana oryndamaǵan jaǵdaıda jaýapkershilikke tartylady.
Jańa saıasat memleketterdiń halyqaralyq mindettemelerin tıisinshe oryndaýyn qamtamasyz etip, shetelge zańsyz ákelingen balalardyń ata-anasyna qaýipsiz ári tezirek oralýyna jaǵdaı jasaýdy kózdeıdi.
AQSh bıligi mundaı isterdi qaraý kezinde tıisti mindetterin oryndamaǵan tulǵalarǵa vıza berýdi shekteıtin jańa saıasatty iske qospaq. AQSh Memlekettik hatshysy Marko Rýbıonyń aıtýynsha, bul shekteý atalǵan adamdardyń otbasy múshelerine de qoldanylady.
Eske sala keteıik, buǵan deıin AQSh búkil álem boıynsha vıza berýdi toqtatqany habarlanǵan edi. Bul sheshim konsýldyq qyzmetterdi jahandyq deńgeıde qaıta uıymdastyrý jáne vıza alýǵa ótinish berýshilerdi tekserý sharalaryn kúsheıtý jumystarymen baılanysty.
