AQSh Memlekettik departamenti birqatar elshilikter men konsýldyqtardy jabý máselesin qarastyryp otyr

ASTANA. KAZINFORM – Tramp ákimshiligi 10 elshilik pen 17 konsýldyqty jabý, sondaı-aq birneshe sheteldik mıssııa qyzmetkerlerin qysqartý nemese biriktirý josparyn qarastyryp otyr, dep habarlaıdy Kazinform menshikti tilshisi. 

Vedomstvonyń qyzmettik hatynda barlyq kontınentterdegi amerıkandyq dıplomatııalyq qatysýdyń qysqarýy sıpattalǵan, The New York Times onymen tanysyp ótti. 

Qysqartý prezıdent Donald Tramptyń úkimettegi federaldyq shyǵyndardy qysqartý, sondaı-aq Memlekettik departament shyǵyndarynyń shamamen 50% qysqartý josparlaryna sáıkes keledi.

Memorandým jabýdy usynyp otyrǵan alty elshilik Afrıkada ornalasqan: Ortalyq Afrıka Respýblıkasy, Erıtreıa, Gambııa, Lesoto, Kongo Respýblıkasy jáne Ońtústik Sýdan. Memorandýmda olardyń fýnktsııalaryn kórshiles elderdegi elshilikterge berý usynyldy. 

Sonymen qatar Eýropada – Lıýksembýrg pen Maltadaǵy eki shaǵyn elshilikti, sondaı-aq Grenada men Maldıv aralyndaǵy dıplomatııalyq mıssııalardy jabý usynylyp otyr. 
Jabylýy usynylatyn konsýldyqtardyń kópshiligi Eýropada ornalasqan. Frantsııada bes konsýldyq bar: Bordo, Lıon, Marsel, Renn jáne Strasbýrgte.

Ekeýi Germanııada – Dıýsseldorf pen Leıptsıgte. Taǵy ekeýi Bosnııa men Gertsegovınada – Mostar men Banıa-Lýkede. 

Memorandýmda sonymen qatar Salonıkıdegi (Grekııa), Florentsııadaǵy (Italııa), Ponta-Delgadadaǵy (Portýgalııa) jáne Edınbýrgtegi (Shotlandııa) konsýldyqtardy jabý usynyldy. Qujat Eýropadan tys jerde ornalasqan taǵy tórt konsýldyqty jabýdy usynady: Dýalada (Kamerýn), Medanda (Indonezııa), Dýrbanada (Ońtústik Afrıka) jáne Pýsanda (Ońtústik Koreıa).

Sondaı-aq Somalı astanasy Mogadıshodaǵy AQSh elshiliginiń qatysýyn aıtarlyqtaı qysqartý nemese tolyǵymen joıý, Iraktaǵy Baǵdad dıplomatııalyq qoldaý ortalyǵyn jabý, sonymen birge Baǵdad pen Erbıldegi dıplomatııalyq ókildikter shyǵyndaryn bir mezgilde qysqartý usynylyp otyr. 

Qujat Japonııa men Kanada sııaqty birneshe konsýldyq mekemesi bar elderde konsýldyq jumysty biriktirýdi usynady. 

Alaıda jańa usynylǵan qysqartý Qurama Shtattardyń Qytaıǵa mańyzdy dıplomatııalyq keńistikti, sonyń ishinde Vashıngtonnyń Beıjińge qaraǵanda kóbirek qatysýy bar álemniń bólikterin berip, Amerıkanyń ulttyq qaýipsizdigine, sonyń ishinde barlaý málimetterin jınaýǵa qaýip tóndiretinine qatysty alańdaýshylyq týdyrdy. 

Buǵan deıin Tramp ákimshiligi klımattyq zertteýlerge bólinetin qarjyny qysqartqanyn jazǵan bolatynbyz.