AQSh Memlekettik departamenti 75 eldiń azamattary úshin ımmıgratsııalyq vızanyń toqtatylýyn túsindirdi

ASTANA. KAZINFORM — AQSh Memlekettik departamenti Kazinform tilshisiniń suraýy boıynsha 75 eldiń azamattaryna ımmıgratsııalyq vızalardy berýdi toqtata turýǵa qatysty resmı túsinik berdi. 

AQSh syrtqysaıası vedomstvosynyń resmı ókili osy jyldyń 21 qańtarynan bastap Memlekettik departament kelesi elderdiń kez kelgeniniń azamattary bolǵan barlyq ótinish berýshilerge ımmıgratsııalyq vıza berýdi toqtatatynyn málimdedi: Aýǵanstan, Albanııa, Aljır, Antıgýa jáne Barbýda, Armenııa, Ázerbaıjan, Bagam araldary, Bangladesh, Barbados, Belarýs, Belız, Býtan, Bosnııa jáne Gertsegovına, Brazılııa, Bırma, Kambodja, Kamerýn, Kabo-Verde, Kolýmbııa, Kot-d’Ivýar, Kýba, Kongo Demokratııalyq Respýblıkasy, Domınıka, Mysyr, Erıtreıa, Efıopııa, Fıdjı, Gambııa, Grýzııa, Gana, Grenada, Gvatemala, Gvıneıa, Gaıtı, Irak, Iran, Iordanııa, Qazaqstan, Kosovo, Kýveıt, Qyrǵyzstan, Laos, Lıvan, Lıberııa, Lıvııa, Moldova, Mońǵolııa, Marokko, Nepal, Nıgerııa, Nıkaragýa, Soltústik Makedonııa, Chernogorııa, ıAmaıka, Pákistan, Kongo Respýblıkasy, Reseı, Rýanda, Sent-Kıts jáne Nevıs, Sent-Lıýsııa, Sent-Vınsent jáne Grenadınder, Senegal, Serra-Leone, Somalı, Ońtústik Sýdan, Sýdan Respýblıkasy, Sırııa, Tanzanııa, Taıland, Togo, Týnıs, Ýganda, Ýrýgvaı, Ózbekstan jáne Iemen.

— Memlekettik hatshy Marko Rýbıo bul úzilisti biz jańa ımmıgranttardyń AQSh vızasyn alý quqyǵyna ıe bola alatynyna, sonyń ishinde olardyń memlekettik kómekke júginbeıtinine kóz jetkizý úshin olardy barynsha tekserýdi qamtamasyz ete alǵansha engizdi, — delingen Memdepartament málimdemesinde.

Tizimde Qazaqstan bolǵanyna qaramastan, bul shara tek ımmıgratsııalyq vıza boıysha AQSh-qa turaqty kóshýdi josparlap otyrǵan adamdarǵa ǵana áser etedi jáne ımmıgratsııalyq emes vızamen AQSh-ta ýaqytsha turýdy qarastyryp otyrǵan azamattarymyzǵa áser etpeıdi. 

— Bul shara tek ımmıgratsııalyq vızalardyń berilýine qatysty qoldanylady. Ol týrıster, sportshylar, bilikti jumysshylar jáne olardyń otbasylaryna arnalǵan ımmıgratsııalyq emes vızalarǵa qoldanylmaıdy, — dep túsindirdi AQSh Memdepartamenti óz jaýabynda.

AQSh ımmıgratsııalyq vızalaryna mynalar kiredi: IR1, CR1, K-3 (AQSh azamatynyń jubaıy), IR3, IR4, IH3, IH4 (AQSh azamattarynyń jetim balalardy memleketaralyq asyrap alýy), IR2, IR5, CR2, F1, F3, F4 (AQSh azamattarynyń otlarynyń belgili bir músheleri), F2A, F2B (zańdy turaqty rezıdentter otbasylarynyń belgili bir músheleri), E (basymdyqtaǵy qyzmetkerler men mamandar), C5, T5, R5, I5 (jumys oryndaryn qurý/ınvestorlar), S (ımmıgranttardyń belgili bir erekshe sanattary) jáne basqalary.

Bul rette Qazaqstan azamattary AQSh-ta ýaqytsha bolý úshin kelesi sanattar boıynsha ımmıgratsııalyq emes vızalardy ala alatynyn naqtylaý qajet: B (týrızm, bıznes, sportshylar), F/M/J (oqý, almasý), H/L/O/P/Q/R (jumys, transfer, talant, árts), E (saýda, ınvestıtsııalar), C (tranzıt), D (ekıpaj músheleri), K (kúıeý/qalyńdyqtar úshin) jáne basqalary.

Alaıda AQSh týrıstik jáne iskerlik vıza alýǵa ótinish beretin Ortalyq Azııadaǵy úsh eldiń azamattaryn vızalyq kepil baǵdarlamasyna qosqanyn eskerý kerek.