AQSh memlekettik hatshysynyń kómekshisi R. Bleık Qyrǵyzstanda júr - kelissózdiń kún tártibinde «Manas» áýejaıyndaǵy avıabaza máselesi
BІShKEK. 2 sáýir. QazAqparat - Búgin Bishkekte Qyrǵyzstannyń prezıdenti Almazbek Atambaev Ońtústik jáne Ortalyq Azııa elderi boıynsha AQSh memlekettik hatshysynyń kómekshisi Robert Bleıkti qabyldady.
Taraptar Qyrǵyzstan men AQSh arasynda yntymaqtastyqty odan ári damytý máselelerin talqylady. Kezdesý barysynda «Qyrǵyzstan AQSh-pen uzaq ýaqytqa yntymaqtastyq jáne dostyq qarym-qatynas ornatýǵa múddeli», - dep atap ótti A. Atambaev.
Respýblıkada AQSh áskerı kúshteriniń bolýy jaıly sóz qozǵaǵan Qyrǵyzstannyń basshysy 2014 jyldyń jazynan keıin «Manas» áýejaıynda ásker qatysýynsyz azamattyq júkterdi tasymaldaý boıynsha ortalyq qurý kerektigin atap ótti.
R. Bleık óz kezeginde Aýǵanstanda ekonomıkanyń qaıta damýy men beıbit ómir súrýdi qalpyna keltirý máselesinde Qyrǵyzstannyń rólin joǵary baǵalaı otyryp, AQSh basshylyǵynyń atynan Almazbek Atambaevqa alǵysyn bildirdi.
Taraptar sondaı-aq saýda-ekonomıkalyq yntymaqtastyq, jaǵymdy ınvestıtsııalyq ahýaldy qurý, lańkestik, ekstremızm sııaqty qazirgi zamanǵy álemdik qaýiptermen kúreste kómek kórsetý máselelerin talqylady.
Qyrǵyz Respýblıkasy Prezıdentiniń baspasóz qyzmeti habarlaǵandaı, kezdesýdiń qorytyndysy boıynsha A. Atambaev pen R. Bleık saýda-ekonomıkalyq jáne ınvestıtsııalyq yntymaqtastyqty tıimdi keńeıtýdiń, onyń ishinde Qyrǵyzstannyń óńirlik jobalaryn iske asyrýda AQSh-tyń qatysýy qajettigin atap ótti.
