AQSh Memlekettik departamenti ben Ladenniń qazirgi sýretin jarııalady
ASTANA. Qańtardyń 16-sy. QazAqparat - AQSh Memlekettik departamentiniń saıty jasyna qaraı ózgertilgen jáne saqal-murty alynǵan Ýsama ben Ladenniń jańa fotorobotyn jarııalady.
Federaldyq tergeý bıýrosy (FBR) kompıýterlik baǵdarlamanyń kómegimen «№1 lańkestiń» qazirgi fotosýretin jasap otyr. Amerıkandyq arnaıy qyzmetterdiń qaraýynda buǵan deıin ben Ladenniń 1998 jyly jasalǵan eski sýreti bolyp kelgen, dep habarlaıdy Associated Press.
AQSh Memlekettik departamentiniń saıtynda ben Ladennen basqa, izdeýde júrgen barlyq halyqaralyq lańkester týraly aqparattar, olardyń fotosýretteri jáne olardy ustaý úshin jarııalanǵan syıaqy somalary jarııalanǵan.
AQSh ben Ladendi ustaǵanǵa 25 mıllıon dollar tóleýge daıyn. Biraq ta 2001 jyldan beri onyń qaıda júrgeni belgisiz.
