AQSh memhatshysy Qazaqstandy Táýelsizdiktiń 26 jyldyǵymen quttyqtady

ASTANA.  QazAqparat - AQSh-tyń Memlekettik hatshysy Reks Tıllerson Qazaqstandy Táýelsizdik kúnimen quttyqtady. Quttyqtaý AQSh Memlekettik departamentiniń saıtynda jarııalandy, dep habarlaıdy QazAqparat tilshisi.

«Amerıka Qurama Shtattarynyń úkimeti atynan Qazaqstan halqyn Táýelsizdiktiń 26 jyldyǵymen quttyqtaımyz. Búginde Amerıka Qurama Shtattary men Qazaqstan - ekonomıkalyq, energetıkalyq, ǵylymı jáne tehnologııalyq yntymaqtastyqty keńeıtýde, aımaqtyq qaýipsizdik pen turaqtylyqty ornatýda birlese jumys isteıtin jaqyn seriktester. Qazaqstannyń BUU Qaýipsizdik Keńesine turaqty emes múshe bolýynan keıin bizdiń jahandyq máseleler boıynsha yntymaqtastyǵymyz tereńdeı tústi», - delingen málimdemede.

Odan bólek, AQSh Memlekettik hatshysy Qazaqstandy «EKSPO-2017» halyqaralyq kórmesin tabysty ótkizýimen quttyqtady.

Buǵan deıin AQSh-tyń Qazaqstandaǵy elshisi Djon Krol qazaqstandyqtardy Táýelsizdik kúnimen qazaq tilinde quttyqtaǵan edi.