AQSh memdepartamenti aýdarmashysynyń Qytaı tyńshysy ekeni anyqtaldy
ASTANA. QazAqparat - AQSh-tyń Federaldyq tergeý bıýrosy (FTB) syrtqy saıasat vedomstvosynda aýdarmashy bolǵan áıeldiń Qytaıdyń paıdasy úshin tyńshylyq etkeni anyqtaldy. Alaıda, oǵan resmı túrde aıyp taǵylǵan joq, dep habarlady «TASS» agenttigi «Fox News» telekompanııasy silteme jasaı otyryp.
2014 jyly AQSh-tyń Merılend shtatynda sotta qaralǵan qujattar aýdarmashynyń qolynda bolǵan. Ol qujattar kúdikti Sıaomın Gaonyń Qytaıda júrgeninde QHR barlaý qyzmetiniń ókili dep tanıtyn adamǵa memlekettik departament sheneýnikteri, AQSh azamattary týraly aqparat berip otyrǵandyǵyn kýálandyrady. Bul qyzmeti úshin ol birneshe myń dollar aqsha alǵan.
Aqparat taratqan telearnanyń málimetine súıensek, aýdarmashy áıel sondaı-aq az ýaqyt memlekettik departamenttiń qupııa aqparatqa ruqsaty bar jáne AQSh Elshilikterin, sonyń ishinde Pákistandaǵy dıplomatııalyq ókildikti jobalaýmen aınalysqan qyzmetkermen birge turǵan. AQSh bıligi aýdarmashy áıeldiń ústinen qylmystyq is qozǵamaý týraly sheshim qabyldaǵan. Onyń sebebi, aıtylǵan joq. AQSh syrtqy saıasat vedomstvo ókilderi Fox News telearnasynyń tilshilerine áıeldiń ortalyqta aýdarma qyzmetin usynǵan merdiger mekeme ortalyǵynda qyzmet etkenin rastady. Qazir ol atalǵan ortalyqta jumys jasamaıtyny aıtylǵan.
