AQSh Meksıka taýarlaryna baj salyǵyn toqtatty
ATYRAÝ. KAZINFORM – Toqtatý týraly sheshim bir aı boıy kúshinde qalady, dep habarlaıdy Kazinform TASS agenttigine silteme jasap.

Meksıka prezıdenti Klaýdııa Sheınbaým AQSh prezıdenti Donald Tramppen telefon arqyly sóıleskennen keıin Vashıngtonnyń meksıkalyq taýarlarǵa engizgen 25 paıyzdyq baj salyǵyn bir aıǵa toqtatatynyn málimdedi.
- Budan bylaı [AQSh engizgen] tarıfter bir aıǵa toqtatyldy, - dep jazdy Sheınbaým X jelisindegi paraqshasynda.
Sheınbaým AQSh prezıdenti Tramppen áńgimelesý barysynda ekijaqty qarym-qatynas pen Meksıkanyń egemendigine úlken qurmet kórsetilgenin aıtty.
- Meksıka Meksıkadan AQSh-qa esirtki tasymalynyń, ásirese fentanıldiń aldyn alý úshin 10 000 Ulttyq gvardııa áskerimen soltústik shekarany dereý kúsheıtedi, - dedi Sheınbaým.
Onyń sózinshe, Amerıka Qurama Shtattary Meksıkaǵa zańsyz qarý-jaraq jóneltilýine jol bermeýge tyrysady.
- Búginnen bastap bizdiń komandalar eki baǵytta jumys isteı bastaıdy: qaýipsizdik jáne saýda, - dedi Meksıka prezıdenti.
Eske sala keteıik, buǵan deıin Iordanııa koroli Abdalla II kelesi aptada Aq úıde Tramppen kezdesetinin habarlaǵan edik.