AQSh Máskeý men Kıev arasyndaǵy bitimgershilik usynysty engizý faktisiniń ózi jetistik dep sanaıdy

ASTANA. KAZINFORM – Reseı men Ýkraınanyń qaqtyǵysty beıbit jolmen retteý josparyn usynýdyń ózi jetistik. Bul týraly AQSh vıtse-prezıdenti Djeı Dı Vens Fox News arnasyna bergen suhbatynda málimdedi, dep habarlaıdy TASS aqparat agenttigi. 

— Reseılikterdiń bitimgershilik josparyn usynyp jatqany — jetistik. Ýkraındyqtardyń naqty usynystar qoıyp otyrǵany — jetistik, — dep atap ótti ol.

— Bizdiń (Qurama Shtattardyń) ustanym: Ýkraınanyń kúıreýin qalamaımyz. Biz, árıne, Ýkraınanyń egemen el bolyp qalýyn qalaımyz. Biraq Reseı ol áli jaýlap almaǵan aýmaqty beredi dep kútpegeni durys, — dedi AQSh ákimshiligi basshysynyń oryn…

— Biz olardyń (reseılikterdiń) oryndy dúnıeden kóp suraıtynyn bildik. Kelissóz osylaı júredi. Bul meni alańdatpaıdy, — dep atap ótti Vens.

— Eger biz reseılikter kelissózdi adal júrgizip jatqan joq degen qorytyndyǵa kelsek, alańdaýǵa negiz bar. Eger bul jaǵdaı bola qalsa, prezıdent (AQSh prezıdenti Donald Tramp): «Biz ketemiz» deıdi. Negizinen, bul, meniń oıymsha, Reseı men Ýkraınaǵa máseleni Qurama Shtattardyń keńesi men deldaldyǵynsyz sheshý múmkindigi beriledi degendi bildiredi, — dep málimdedi vıtse-prezıdent.

Onyń kózqarasy boıynsha, jaǵdaıdyń osylaı damýy eshkimge, sonyń ishinde AQSh, Reseı jáne Ýkraına úshin jaqsy bolmas edi.

— Biz bul jigitterdi tek qudyqqa apara alamyz, biz olarǵa sý ishkize almaımyz. Prezıdent (Tramp) dál solaı jasady, — dep shamalady Vens.

Ol eger protsess bir orynda toqtap tur dep sheshse, Vashıngton Ýkraınadaǵy retteýdi jeńildetýge tyrysýdy toqtata alatynyn qaıtalady. Vıtse-prezıdent AQSh-tyń mundaı jumys úshin belgilengen merzimdi naqtylaǵan joq.

Aıta keteıik, Tramp Ýkraına men Reseıdi atysty 30 kúnge toqtatýǵa shaqyrdy.