AQSh Mahmud Abbasqa BUU Bas Assambleıasyna qatysý úshin vıza bermedi
ASTANA.KAZINFORM – Vashıngtonnyń bul sheshimi Nıý-Iorkte álem kóshbasshylarynyń jyl saıynǵy kezdesýi qarsańynda Palestına tarapynan qarsylyq týǵyzdy, dep habarlaıdy Kazinform agenttiginiń menshikti tilshisi.
AQSh Palestına prezıdenti Mahmud Abbasqa kelesi aptada ótetin BUU Bas Assambleıasyna qatysý úshin elge kirý vızasyn bermedi.
Donald Tramp ákimshiligi Palestına kóshbasshysynyń otyrysqa jeke qatysýyna ekinshi jyl qatarynan kedergi keltirip otyrǵany habarlandy.
2025 jylǵy qyrkúıekte Abbas Bas Assambleıa aldynda beınebaılanys arqyly sóz sóıleýge májbúr bolǵan.
Sanctioning Officials of the Palestinian Authority and Members of the Palestine Liberation Organization https://t.co/mCPpNa3AEf
— U.S. State Dept - Near Eastern Affairs (@StateDept_NEA) September 17, 2026
AQSh Memlekettik departamenti sársenbi kúni Palestınany azat etý uıymy músheleri men Palestına ákimshiligi ókilderine qatysty vızalyq shekteýlerdi uzartatynyn málimdedi. Vedomstvo olardy reformalar jónindegi mindettemelerin oryndamady jáne Vashıngtonnyń baǵalaýynsha, beıbitshilik ornatý perspektıvalaryna nuqsan keltiretin áreket jasady dep aıyptady.
Amerıkalyq tarap negizderdiń qatarynda Izraılge qatysty halyqaralyq sot organdaryna júginý jáne Palestına memleketin birjaqty moıyndatýǵa baǵyttalǵan bastamalardy atady. Sondaı-aq AQSh Memlekettik departamenti ózi terrorızmge qatysy bar dep sanaıtyn tulǵalarǵa tólem jasaý jáne zorlyq-zombylyqty dáripteý máselelerine qatysty da talap qoıdy.
Palestına Syrtqy ister mınıstrligi vızadan bas tartýdy negizsiz dep atady.
— Bul shara senimdi qalpyna keltirýge, Palestına men AQSh arasyndaǵy qarym-qatynasty damytýǵa, sondaı-aq eki memleket sheshimin júzege asyrýǵa jáne óńirde beıbitshilik pen turaqtylyqqa qol jetkizýge qajetti saıası jaǵdaı qalyptastyrýǵa baǵyttalǵan kúsh-jigerge qaıshy keledi, — delingen vedomstvo málimdemesinde.
Beısenbi, 17 qyrkúıekte Bas Assambleıa aldaǵy jıyn barysynda Abbasqa beıneúndeý joldaýǵa múmkindik berý máselesi boıynsha daýys berýi tıis.
Sonymen birge Vashıngton BUU janyndaǵy Palestına ókildigi qyzmetkerlerine vızalyq shekteýlerden bosatýdy saqtaıdy. Bul olardyń Nıý-Iorktegi jumysyn jalǵastyrýyna múmkindik beredi.
1947 jylǵy BUU shtab-páteri týraly kelisim, ádette, AQSh-ty sheteldik dıplomattardyń uıymǵa kirýin qamtamasyz etýge mindetteıdi. Alaıda Vashıngton qaýipsizdik, ekstremızmge qarsy kúres jáne syrtqy saıasat qaǵıdattary negizinde vıza berýden bas tartýǵa quqyǵy bar ekenin málimdeıdi.
Palestına BUU-da uıym múshesi emes baqylaýshy memleket mártebesine ıe jáne Bas Assambleıada daýys berý quqyǵy joq. Osyndaı mártebege Vatıkannyń Qasıetti Taq ókildigi de ıe.
