AQSh magnaty Makaodaǵy oıynhanaǵa 4 mıllıard dollar jumsamaq
ASTANA. 6 maýsym QazAqparat - Amerıkandyq oıynhana magnaty Stıv Ýınn Makaoda quny 4 mıllıard dollar turatyn jańa oıynhana keshenin salmaq, dep habarlady Lenta.rý.
Ýınn bul joba aımaqtyń ınvestıtsııalyq ahýalyn jaqsartyp, klıentterdi tartýǵa jáne Makaodaǵy oıynhanalardyń tabysyn ulǵaıtýǵa járdemdesedi dep málimdedi.
Associated Press agenttiginiń habarlaýynsha, Ýınn 557 myń sharshy metr aýmaqta jalpy sany eki myń nómirge arnalǵan qonaq úılerin, túngi klýb, on meıramhana, birneshe dúken, sondaı-aq 500 oıyn ústeli ornalasatyn oıynhana keshenin salmaqshy.
Makao QHR-dyń ońtústigindegi avtonomııalyq aýmaq. Qytaıda oıyn bıznesine tyıym salynǵanymen, Makaonyń óz zańnamasy bar (QHR-dyń ortalyq bıligine osy okrýgtiń qorǵanys júıesi ǵana baǵynady), munda oıynhana qurylysyna ruqsat etilgen. Makaoda oıyn-saýyq bıznesi jaqsy damyǵan, sonymen qatar aımaq iri qarjy jáne logıstıka ortalyǵy. Makao aýmaǵynda 33 iri oıynhana jumys isteıdi.
70 jastaǵy Stıv Ýınn álemniń eń baı oıyn magnattarynyń biri. 2012 jyldyń birinshi toqsanynda onyń kompanııasynyń tabysy 1,3 mıllıard dollardy qurady. Onyń 70 paıyzy Makaodan alyndy. Stıv Ýınnniń sondaı-aq Las-Vegasta da oıynhana jelisi bar.
