AQSh Madýronyń eki-úsh jyl ishinde otstavkaǵa ketý týraly usynysyn qabyldamady

ASTANA. KAZINFORM — AQSh bıligi Nıkolas Madýronyń eki-úsh jyldyq ótpeli kezeńnen keıin otstavkaǵa ketý týraly usynysyn qabyldamady. Vashıngton Venesýelaǵa qarsy áskerı operatsııa nusqalaryn qarastyryp jatyr, dep jazady Euronews The New York Times gazetine silteme jasap.

Venesýela prezıdenti Nıkolas Madýro AQSh-pen beıresmı kelissózder kezinde eki-úsh jyl ishinde otstavkaǵa ketýge daıyn ekenin málimdegen, alaıda bul usynysty Vashıngton qabyldamaǵan, dep habarlaıdy The New York Times gazeti men AP agenttigi derekkózderge silteme jasap.

Usynysqa amerıkalyq energetıkalyq kompanııalarǵa Venesýelanyń munaı resýrstaryna qol jetkizý quqyǵyn berý de kiredi.

AP derekkózine sáıkes, venesýelalyq sheneýnikter ótpeli kezeńde vıtse-prezıdent Delsı Rodrıges memlekettiń basshysy qyzmetin atqaryp, 2031 jylǵa deıin osy qyzmette qalýdy, biraq qaıta saılaýǵa túspeýdi usynǵan.

Vashıngton bul usynysty qabyldamaǵan, óıtkeni AQSh Madýro úkimetiniń legıtımdiligin moıyndamaıdy jáne «Madýronyń bılikti tapsyrýdy keıinge qaldyrýynyń kez kelgen túri Aq úı úshin qolaısyz» dep jazady NYT.

The New York Times málimetinshe, AQSh ákimshiligi Venesýelaǵa qarsy áskerı operatsııanyń túrli nusqalaryn qarastyryp jatyr, onyń ishinde Karıb teńizindegi qaýipsizdikti qamtamasyz etý jónindegi aýqymdy strategııa aıasynda arnaıy jasaq kúshterin paıdalanyp, Madýrony tutqyndaý jospary da bar.

Habarlarǵa qaraǵanda, Aq úı Venesýela úkimetine qysym kórsetýdiń sanktsııalardy kúsheıtý, dıplomatııalyq qadamdar jáne aımaqtaǵy áskerı qatysýdy arttyrý syndy túrli tásilderin qarastyryp otyr.

The New York Times derekkózderi Tramptyń OBB-nyń (TsRÝ) Venesýela aýmaǵynda jasyryn operatsııalar júrgizý josparyn quptaǵanyn aıtady.

Eske sala ketsek, Tramp Venesýela prezıdentimen kelissóz júrgizýi múmkin ekenin jazǵanbyz.

Onyń aldynda AQSh-tyń ushaq tasymaldaýshy kemeleri Karıb teńizi aıdynyna engeni habarlanǵan.