AQSh Qyrǵyzstanǵa eldiń memlekettik shekarasyn nyǵaıtýǵa kómek kórsetý máselelerin talqylady
BІShKEK. 19 qańtar. QazAqparat /Arnur Rahymbekov/ - Qyrǵyz Respýblıkasynyń Prezıdenti Roza Otynbaeva AQSh Memlekettik hatshysynyń Ońtústik jáne Ortalyq Azııa elderi boıynsha kómekshisiniń orynbasary Sıýzen Ellıot bastaǵan AQSh delegatsııasyn qabyldady.
Kezdesý barysynda amerıkan tarapy AQSh-tyń Aýǵanstandaǵy áskerı-ekonomıkalyq belsendiligi týraly, aldaǵy ýaqytqa josparlanyp otyrǵan is-sharalary jaıly habardar etti.
AQSh Memhatshysy kómekshisiniń orynbasary Aýǵanstandaǵy operatsııalar boıynsha AQSh-qa kórsetip otyrǵan qoldaýy úshin Qyrǵyz Respýblıkasyna alǵys bildirdi.
Prezıdent Roza Otynbaeva óz kezeginde eldegi qaýipsizdikti, quqyq tártibin qamtamasyz etý, lańkestikpen jáne ekstremızm kórinisterimen kúresý baǵytynda júrgizilip otyrǵan saıasat týraly aıtyp berdi.
Kezdesý barysynda taraptar sondaı-aq memleket shekarasynyń kúzetin kúsheıtýge kómek kórsetý máselelerin talqylady.
