AQSh qylmyspen kúres salasyn reformalaýda álemniń 70 elinde 2,6 mıllıard dollardyń baǵdarlamalaryn júzege asyrýda
ALMATY. Jeltoqsannyń 9-y. QazAqparat /Erlik Erjanuly/ - AQSh-tyń Halyqaralyq esirtkimen kúres jáne zańdylyqty saqtaý mekemesiniń baǵdarlamalaryn júzege asyrýǵa 7 myńdaı adam atsalysýda. Ony AQSh Memlekettik hatshysynyń kómekshisi Devıd Djonson búgin Almatydaǵy Іshki ister akademııasynyń Esirtki bıznesine qarsy kúres jónindegi vedomstvoaralyq oqý ortalyǵynda bolǵan kezde aıtty,
dep habarlaıdy QazAqparat.
"AQSh Memlekettik departamentiniń Halyqaralyq esirtkimen kúres jáne zańdylyqty saqtaý (INL) mekemesi halyqaralyq esirtkimen kúres salasyndaǵy iri agenttikterdiń biri sanalady. AQSh Úkimetiniń álemdegi qylmyspen kúres salasyn reformalaýǵa baǵyttalǵan jetekshi mekemesi qazirgi ýaqytta álemniń 70 elinde shamamen 2,6 mıllıard dollardyń baǵdarlamalaryn júzege asyryp jatyr. Uzaq jyldar boıy INL saıasaty esirtkimen kúreske baǵyttalyp kelgen edi. Ýaqyt óte kele biz jumys aıasyn qylmystyq is júrgizý salasyn reformalaý jáne quqyq qorǵaý organdarynyń áleýetin kúsheıtý saýaldaryna deıin keńeıttik", deıdi Devıd Djonson. AQSh Memlekettik departamentindegi Memlekettik hatshy kómekshisiniń aıtýynsha, bul mekeme túrli kıkiljińder bolyp jatqan jáne ony bastan ótkizgen elderde jumys jasaıdy. Qaı elde jumys istep jatqanymyzǵa qaramastan, INL-diń basty maqsaty - óz elderi shekaralarynyń aıasynda qylmystyq ortanyń qaýpin azaıtýda áriptesterimizdiń áleýetin arttyrý, memleketaralyq qylmystyq toptar men qylmyskerlerdiń uıasyn buzý.
