AQSh qupııa qyzmeti Ilon Masktyń jazbasyna baılanysty tergeýdi bastady

ASTANA. KAZINFORM – Memlekettiń joǵary laýazymdy tulǵalaryn qorǵaýǵa jaýapty AQSh Qupııalyq qyzmeti bıznesmen jáne H áleýmettik jeliniń ıesi Ilon Masktyń tvıtine baılanysty tergeýdi bastady. Bul týraly beısenbi, 19 qyrkúıekte Bloomberg habarlady, dep jazady DW.

Mask taǵy bir áleýmettik jeli qoldanýshysynyń tvıtin qaıta jarııalady, onda ol: «Nege olar Donald Trampty óltirgisi keledi?» dep jazǵan. SpaceX negizin qalaýshy óz atynan: «Eshkim tipti Baıdendi/Kamalany óltirýge tyryspaıdy» dep qosty. Keıin Ilon Mask bul tvıtti «ázil» dep atady. Degenmen, jazbany ondaǵan mıllıon X qoldanýshylary, sonyń ishinde Qupııa qyzmet qyzmetkerleri kórip úlgergen.

Qupııalyq qyzmet «qaýip bar-joǵyn anyqtaý» maqsatynda tergeý júrgizip jatyr, dep jazady Bloomberg. 

Tvıtti joıǵannan keıin Ilon Mask bylaı dep jazdy: «Men bir nárse úırendim: men bir top adamdarǵa birdeńe aıtsam, olar kúledi, biraq bul X jazbasyndaǵy sııaqty kúlkili bolady degendi bildirmeıdi». 

Amerıka Qurama Shtattarynyń prezıdentin nemese vıtse-prezıdentin qorqytý úlken aıyppul nemese bes jylǵa deıin bas bostandyǵynan aıyrylýy múmkin aýyr qylmys bolyp tabylady. Tergeý Ilon Mask mindetti túrde jaýapqa tartylady degendi bildirmeıdi, biraq ol, eń aldymen, Djo Baıden men Kamala Harrıske qaýip tóndirmeıtinin dáleldeý kerek, dep atap ótti Axios.

Aq úı Masktyń jazbasyn aıyptap, ony «jaýapsyz rıtorıka» dep atady. AQSh prezıdentiniń ákimshiligi «Zorlyq-zombylyqty tek aıyptaý tıis ekenin, ony kótermeleýge nemese mazaq etýge bolmaıtynyn» eskertti.

Aıta keteıik, buǵan deıin Ramzan Qadyrovtyń pýlemetpen jabdyqtalǵan Cybertruck kóligin Ilon Mask «qashyqtyqtan óshirip qoıǵanyn» jazǵan edik.