AQSh Qundyzdy basyp alǵan tálipterge áýeden soqqy jasady
ÁBÝ-DABI. QazAqparat - Aýǵan qaýipsizdik kúshteri Aýǵanstannyń soltústigindegi Qundyz provıntsııasyndaǵy Qundyz qalasynda bılikti qolǵa almaqqa talpynys jasap jatyr.
Eske sala keteıik, seısenbige qaraǵan túni Qundyz qalasy «Talıban» qozǵalysy sodyrlarynyń jappaı shabýylyna ushyraǵan. Jergilikti BAQ-tyń málimetterinshe, tálipter qalaǵa kirip, Qundyzdyń ortasynda kúsh qurylymdarynyń qyzmetkerlerine shabýyldady. Budan basqa, olar provıntsııalyq ortalyqtan negizgi shyǵý joldary men áýejaıǵa baratyn joldy qorshap tastady. Derekkózderdiń habarlaýynsha, «Talıbannyń» bul shabýyly uıymdastyrýshylyǵymen jáne qatysýshy adamdardyń kóp sanymen erekshelenip otyr.
Talıbtardyń jańa kóshbasshysy molla Ahtar Mansur jergilikti turǵyndardy «eshteńeden qoryqpaýǵa» shaqyrdy. Sondaı-aq ol Kabýldan óziniń jeńilgenin moıyndaýǵa shaqyrdy.
Qundyz qalasy ortalyǵynyń qulaýy seısenbi kúni bılik basynda júrgenine bir jyl tolýyn atap ótken AIM prezıdenti Ashraf Ǵanıdiń úkimeti úshin kúrdeli soqqy bolyp otyr.
Aýǵanstannyń Qorǵanys mınıstrligi úkimet áskeriniń jaqyn ýaqytta qalany sodyrlardan uryspen qaıtaryp alatynyn málimdedi. Olaı bolǵanymen, aýǵandyq BAQ ótken túnde Kabýldyń qaýipsizdik kúshteriniń áýejaıda bolyp, áskerı is-qımyldarǵa kirispegenin habarlap otyr. Budan bólek, búgin "Tolo" telearnasy Qundyz qalasynyń shetindegi "Talıban" nysandaryna AQSh áýe kúshteri soqqy jasaǵanyn habarlady.
