AQSh koronavırýs eń kóp taraǵan elder arasynda úshinshi orynǵa shyqty
NUR-SULTAN. QazAqparat - Amerıka Qurama Shtattary koronavırýs indetin juqtyrǵandary eń kóp álemdegi úsh eldiń qataryna qosyldy.
Mundaı derekti el bıliginiń, Dúnıejúzilik densaýlyq saqtaý uıymynyń jáne ózge de resmı derekkózderdiń málimetterine súıene otyryp, shynaıy jaǵdaıǵa esep júrgizip otyrǵan Djons Hopkıns ýnıversıteti keltiredi, dep habarlaıdy QazAqparat tilshisi TASS agenttigine silteme jasap.
Atalǵan ýnıversıtettiń derekterine sáıkes, Qytaıda koronavırýs juqtyrýdyń 81 321 oqıǵasy tirkelgen. Bul rette 3 260 adam qaza taýyp, 71 862 adam jazylyp shyqqan.
Italııada vırýs juqtyrǵandar sany - 53 578 adam. Onyń ishinde 4 825 adam kóz jumsa, jazylyp shyqqany qazirgi ýaqytta 6 072 adam ǵana. Al AQSh-ta osy ýaqytta 25 493 adamnyń vırýs juqtyrǵany anyqtalyp otyr. Qaza tapqandar sany - 307, emdelgenderi - 171 adam. Qurama Shtattardan keıingi vırýs eń kóp taraǵan elderdiń qatarynda Ispanııa (25,3 myń), Germanııa (22,2 myń) jáne Iran (20,6 myń) memleketteri tur.
Jalpy, atalǵan ýnıversıtettiń málimetterine sáıkes, búginde álemde 304,5 myń adam koronavırýs juqtyrǵany belgili. Dál osy vırýstan qaıtys bolǵandardyń sany 13 myńǵa jýyqtap qaldy. Al vırýstan saýyqqandardyń sany 91,6 myńnan asyp jyǵylady.
