AQSh Qorǵanys mınıstrligi generaldar men admıraldar sanyn 20%-ǵa qysqartady

VAShINGTON. KAZINFORM – AQSh Qorǵanys mınıstrligi qarýly kúshterdiń qurylymyn ońtaılandyrý jáne jedel tıimdilikti arttyrý maqsatynda generaldar men admıraldar sanyn 20%-ǵa qysqartý týraly sheshim qabyldady. Bul týraly Anadoly jazdy. 

Mınıstrlik taratqan málimdemede armııanyń qabileti men jaýyngerlik daıyndyǵyn saqtaý úshin áskerı basshylyq qurylymyn jeńildetý qajet ekeni atap ótilgen.

— Bul sharalar áskerı basqarý júıesin ıkemdirek ári zamanaýı etýge baǵyttalǵan. Jańa júıe bıýrokratııalyq emes, kerisinshe ınnovatsııany qoldaýǵa jáne jedel jetildirýge negizdeledi, — delingen málimdemede.

Atap aıtqanda, tórt juldyzdy generaldar men admıraldardyń sany kem degende 20%-ǵa qysqarady. Sonymen qatar bul qysqartý Ulttyq gvardııa quramynda qyzmet etetin joǵary shendi ofıtserlerge de áser etedi.

— Bul qadam qabyldanǵan soń qorǵanys qurylymy burynǵydan da mobıldi jáne tıimdi bolady. Osy sharalar arqyly biz álemdegi eń qýatty jaýyngerlik kúsh bolyp qala beremiz, beıbitshilikti kúsh arqyly nyǵaıtyp, tıimdilik, jańashyldyq jáne daıarlyq deńgeıin arttyramyz, — dep qorytyndylady vedomstvo.

Aıta keteıik, buǵan deıin 2026 jyly AQSh áskerı shyǵyndaryn 1,01 trıllıon dollarǵa ulǵaıtýǵa nıetti ekenin jazdyq.

Sondaı-aq, AQSh Shyǵys Eýropadaǵy 6000 sarbazyn almastyrady.