AQSh kongresmenderi Qazaqstan týraly kitaptar oqydy
Vashıngtonda Qazaqstan Respýblıkasynyń AQSh-taǵy Elshiliginiń Kongress kitaphanasynyń qoryna Qazaqstan ádebıeti men mádenıeti týraly kitaptardy saltanatty túrde tabys etý sharasy ótti, dep habarlaıdy Kazinform agenttiginiń tilshisi.
Kitaptar Amerıkanyń eń kóne zertteý kitaphanasynyń qoryna berildi. Olar amerıkalyq oqyrmandardyń Qazaqstan týraly bilimin keńeıtip, bolashaq urpaq úshin mádenı yntymaqtastyqtyń kópiri bolýy tıis.
Birinshi kitap – «Abaı armany» ulttyq mádenıet pen ádebıette mańyzdy orny bar qazaqtyń uly aqyny, oıshyl jáne fılosofy týraly baıandaıdy.
«Shoqan Ýálıhanovtyń tańdamaly shyǵarmalary» – kitapta kórnekti qazaq etnografynyń Qazaqstan tarıhy men mádenıetine qosqan úlesi kórsetilgen, ony sheteldik avtorlar N.Fıldıng pen doktor A.Teıt jazǵan.
«Qazirgi qazaq ádebıeti» qazaq mádenıeti men dúnıetanymynyń prozasyn qamtıdy.
«Asy ústirti» amerıkalyq oqyrmandardy Almatynyń shyǵysyndaǵy ásem tabıǵat peızajdarymen tanystyrady.
Qazaqstan Respýblıkasynyń AQSh-taǵy Elshiligi ókilderiniń atap ótýinshe, Qazaqstan men Qurama Shtattar arasyndaǵy ekijaqty qarym-qatynas qarqyndy damyp kele jatqanyn jáne mádenı yntymaqtastyq seriktestikti odan ári nyǵaıtýǵa serpin bola alady.
Kongress kitaphanasynyń ókili Hırad Dınavarı Ortalyq Azııa týraly katalogtardy tolyqtyratyn Qazaqstan jaıly tamasha kitaptar úshin alǵysyn bildirdi.
Onyń atap ótýinshe, kitaphanada arab tilinde Qazaqstan týraly alǵashqy materıaldar jınaqtary bar. Arab qarpimen jazylǵan qazaq tilinde el týraly jınaqtar da bar. Bizdiń memleketimiz týraly orys tilinde kitaptar, aǵylshyn tilinde jekelegen anyqtamalyqtar bar.
Syıǵa berilgen Qazaqstan týraly aǵylshyn tilindegi kitaptar – úlken syılyq, óıtkeni amerıkalyq oqyrmandardyń kópshiligi shet tilderindegi ádebıetti oqymaıdy.
Saltanatty sharaǵa Djordj Vashıngton ýnıversıtetinde taǵylymdamadan ótip jatqan jáne Kongress kitaphanasynda Ortalyq Azııa boıynsha ǵylymı jumystarmen aınalysyp júrgen «Bolashaq» baǵdarlamasynyń «500 ǵalym» jobasynyń stıpendıattary qatysty.
L.N.Gýmılev atyndaǵy túrkitaný kafedrasynyń professory Ajar Shaldarbekovanyń atap ótýinshe, osyndaı kezdesýler Qazaqstan men Qurama Shtattar arasyndaǵy dıplomatııalyq mádenı qatynasty nyǵaıtý úshin óte mańyzdy.
Qazaqstan Respýblıkasynyń AQSh-taǵy Elshiliginiń Kongress kitaphanasynyń qoryna Qazaqstan tarıhy men mádenıeti týraly qyzyqty ári mańyzdy ǵylymı eńbekterdi tabystaý sharasynyń mańyzy zor.
«Qazirgi ýaqytta Qazaqstan álemdik arenada óz pozıtsııalaryn kúsheıtip, mádenı baılanystaryn keńeıtip otyr. Endi amerıkandyq oqyrmandar Qazaqstan týraly aqparatty aǵylshyn tilinde oqı alady. Mundaı sharalar jalǵasyn taýyp, dástúrge aınalýy tıis dep oılaımyn», - dedi A.Shaldarbekova.
