AQSh Kongresiniń Ókilder palatasy krıptovalıýta týraly zań jobasyn maquldady
ASTANA. KAZINFORM – Sársenbi kúni Ókilder palatasy tsıfrlyq aktıvter naryǵyn retteý týraly zań jobasyn maquldaǵan kezde krıptoındýstrııa AQSh tarıhyndaǵy eń úlken saıası jeńiske qol jetkizdi, dep habarlaıdy Crypto News.
AQSh Kongresiniń Ókilder palatasy «HHІ ǵasyrǵa arnalǵan qarjylyq ınnovatsııalar men tehnologııalar týraly zańdy» (FIT21) maquldaý úshin 279-ǵa qarsy 136 daýys berdi, bul rette demokrattar óte kúshti qoldaý kórsetti. Jalpy alǵanda, zań jobasyna 208 respýblıkashyl men 71 demokrat daýys berse, 3 respýblıkashyl men 133 demokrat qarsy boldy.
Endi bul másele AQSh Senatynyń qaraýynda, onyń bolashaǵy anyq emes, óıtkeni buǵan uqsas zań jobasy joq.
AQSh krıptoretteýdi ornatýda basqa jahandyq ıýrısdıktsııalardan artta qaldy, biraq mundaı qadaǵalaýdy júzege asyrý aıaqtalýdan áli alys.
Kóbine Ókilder palatasynyń respýblıkashyldary qoldaǵan zań tsıfrlyq aktıvterdi jetekshi retteýshi jáne baǵaly qaǵazdarmen baılanysty emes spot naryqtaryn baqylaýshy retinde Taýarlyq fıýchersterdi saýdalaý komıssııasyn qurady, token krıptovalıýtasy baǵaly qaǵaz ne taýar ekenin naqty anyqtaıdy, sol arqyly AQSh-tyń krıptovalıýta naryqtaryn retteý rejımin ornatady, tutynýshylardyń quqyqtaryn qorǵaıdy.
Prezıdent Djo Baıden óziniń saıası málimdemesinde zań jobasyna veto qoıatynyn aıtpasa da, oǵan qarsy shyqty.
Baǵaly qaǵazdar jáne bırja komıssııasynyń (SEC) tóraǵasy Gerı Gensler de zań jobasynyń qajetsiz ekenin jáne qoldanystaǵy baǵaly qaǵazdar týraly zańdarǵa qaýip tóndiretinin alǵa tartyp, zańnamaǵa úzildi-kesildi qarsy shyqty.
Ókilder palatasynyń Qarjy qyzmetteri komıtetindegi joǵary laýazymdy demokrat Maksın Ýoters (Kalıfornııa shtaty) bul zań jobasy krıptokásiporyndarǵa baǵaly qaǵazdar týraly zańdardan jaltaryp, jaýapkershilikten qutylýǵa múmkindik beredi dep sendirdi.
«Olar qazirdiń ózinde krıptovalıýtalyq baǵaly qaǵazdardy zańsyz shyǵarý nemese satyp alý-satý arqyly mıllıardtaǵan dollar paıda tapty. Al respýblıkashyldar endi bul zańsyz áreketterdi zańdy etý arqyly marapattaýdy usynyp otyr», - dedi M.Ýoters.
