AQSh Kongresinde bılik aýysýy múmkin: demokrattar Ókilder palatasyn baqylaýǵa almaq
ASTANA. KAZINFORM — NBC News boljamdaryna qaraǵanda, demokrattar Ókilder palatasyn sońǵy jıyrma jylda eń úlken aıyrmashylyqpen baqylaýǵa aldy, dep habarlaıdy Kazinform agenttiginiń menshikti tilshisi.
Taldaýǵa sáıkes, demokrattar Ókilder palatasyndaǵy 435 orynnyń shamamen 248-in jeńip almaq. Qorytyndy nátıje osy boljamnan birneshe orynǵa kóp nemese az bolýy múmkin, biraq sonyń ózinde demokratııalyq partııa palatadaǵy basymdyqqa ıe bolý úshin qajetti 218 orynnan aıtarlyqtaı kóp mandat almaq.
Demokrattarǵa palatadaǵy basymdyqty qaıtaryp alý úshin qosymsha úsh oryn ǵana alý qajet edi. Boljamǵa sáıkes, olar buryn Respýblıkalyq partııa ıelengen kóptegen oryndardy qaıtaryp aldy. Olar, ásirese Donald Tramp 2024 jylǵy saılaýda jeńip alǵan okrýgterde kóp jetistikke jetip otyr.
Demokrattardyń jeńisi Tramp qabyldaǵan sharaldardy kópshiliktiń qoldamaýyna qatysty referendim ekeni aıtylyp júr. Atap aıtqanda, Aq úı basshysy qataıtqan ımmıgratsııalyq zańdar, Irandaǵy segiz aılyq soǵys, benzın, azyq-túlik jáne basqa da taýarlardyń baǵasynyń ósýine ákep soqtyrǵan AQSh odaqtastarynyń taýarlaryna engizilgen tarıfter amerıkalyqtarǵa unaı qoımaǵan.
2027 jyldyń 3 qańtarynda, jańa AQSh Kongresi qyzmetine kirisken kezde, Ókilder palatasyn Demokratııalyq partııa baqylaýy múmkin. Bul Tramptyń ekinshi merziminde Kongresti tolyq baqylamaǵan alǵashqy jaǵdaı bolǵaly tur.
Amerıkalyqtar Ókilder palatasynyń barlyq 435 múshesin jáne Senattyń úshten bir bóligin, ıaǵnı 100 senatordyń 35-in saılaıtynyn buǵan deıin de jazǵan edik. Poshta arqyly jiberilgen bıýlletenderdi, sondaı-aq basqa da daýystardy sanaý saılaý ýchaskeleri jabylǵannan keıin de jalǵasýy múmkin. Sondyqtan, keıbir okrýgterdegi qorytyndy nátıjeler birneshe kún nemese aptadan keıin anyqtalýy múmkin.
46 saılaý okrýgi (12 paıyz) negizgi saıası tartys alańyna aınalmaq.
