AQSh Kongresiniń kitaphanasynda Naýryz meıramy atap ótildi
STANA. Naýryzdyń 19-y. QazAqparat - Naýryzdyń 17-si kúni AQSh Kongresi kitaphanasynyń bas zalynda Naýryz meıramynyń qurmetine arnalǵan saltanatty dıplomatııalyq qabyldaý ótti.
Bul sharaǵa halyqtary osynaý Ulystyq Uly kúnin atap ótetin elderdiń Vashıngtonda tirkelgen elshilikteri atsalysty, dep habarlady Qazaqstannyń AQSh-taǵy elshiliginiń baspasóz qyzmetinen.
Saltanatty qabyldaýǵa qatysqan AQSh-tyń resmı tulǵalary, kongresshiler, dıplomatııalyq korpýstyń, isker jáne akademııalyq toptardyń ókilderi ulttyq mádenıet pen salt-dástúr jádigerleri qoıylǵan «qazaq buryshyna», sondaı-aq Qazaqstanda Naýryz meıramynyń toılaný dástúri týraly derekter ilingen tanymdyq stendke joǵary baǵa berdi. Amerıkandyq qonaqtar sonymen birge, Naýryz-kóje daıyndaý barysymen tanysý jáne kójeden dám tatý múmkindigine ıe boldy.
Qabyldaýdan keıin kitaphananyń kontsert halynda merekelik kontsert qoıyldy. Onda AQSh-ta bilim alyp jatqan jas daryndar Oljas Baıalbaev (dombyra) pen Aıjan Tóleýbaeva (qobyz) óner kórsetti. Kesh qonaqtary qazaqstandyq stýdentterdiń tamasha ónerine tánti boldy.
1800 jyly qurylǵan Kongress kitaphanasy AQSh-tyń baıyrǵy mádenı mekemesi jáne bilim men ilimniń álemdegi eń úlken qory bolyp tabylady.
