AQSh Kongresinde Semeı ıadrolyq polıgony jabylýynyń 30 jyldyǵyna oraı qarar usynyldy

VAShINGTON. QazAqparat - AQSh Kongresinde Semeı ıadrolyq polıgony jabylýynyń 30 jyldyǵyna oraı qarar usynyldy. Bul týraly QazAqparat SІM silteme jasap habarlaıdy.

AQSh Ókilder palatasynyń músheleri D.Taıtýs, S.Shabot jáne E.Bera Kongresstiń Halyqaralyq ister jónindegi komıtetiniń qaraýyna Semeı ıadrolyq synaq polıgony jabylýynyń 30 jyldyǵyna oraı №616 qarardy engizip tirkedi.

Qujatta Qazaqstannyń jappaı qyryp-joıý qarýyn taratpaý jónindegi jahandyq rejımdi nyǵaıtý jónindegi dáıekti jumysyna, sondaı-aq osy jyly 30 jyldyǵy atap ótiletin AQSh-pen túrli salalardaǵy, sonyń ishinde qaýipsizdik, adam quqyqtary jáne basqa da salalardaǵy ekijaqty qatynastardy odan ári damytýǵa beıildiligi atap ótildi.

Kongressmenderdiń bastamasy AQSh zań shyǵarýshy organy músheleriniń Qazaqstannyń taratpaý rejımin nyǵaıtýǵa jáne jahandyq qaýipsizdikke qosqan úlesine, onyń ishinde Tuńǵysh Prezıdent – Elbasy Nursultan Nazarbaevtyń osy saladaǵy kúsh-jigerine jáne álemge ıadrolyq qaterdi azaıtý isindegi birlesken jetistikterine nazar aýdaratynyn kórsetti.