AQSh Kongresi Djo Baıdenniń prezıdent saılaýyndaǵy jeńisin resmı rastady
VAShINGTON. QazAqparat – AQSh Kongresi el prezıdenttigine úmitker Djo Baıdenniń saılaýdaǵy jeńisin resmı rastady, dep habarlaıdy QazAqparat VVS-ge silteme jasap.
«AQSh Kongresi Baıdenniń jeńisin bekitti. Formaldi protsedýra uzaqqa sozylyp ketti, alaıda barlyǵy saqtaldy. Tańerteń saǵat úsh jarym kezinde vıtse-prezıdent Maık Pens otyrysty jabyq dep jarııalady», - delingen aqparatta.
78 jastaǵy Djo Baıden Amerıkanyń 46-ynshy prezıdenti boldy. Inaýgýratsııa 20 qańtarǵa josparlanǵan.
Eske salaıyq,sársenbi kúni AQSh Kongresi saılaýshylardyń daýysyn eseptep, 2020 jylǵy prezıdent saılaýynyń qorytyndysyn shyǵarý úshin jınalǵan bolatyn. Saılaýda demokrattar partııasynyń ókili Djo Baıden jeńiske jetken edi.
Alaıda, buǵan deıingi prezıdent Donald Tramptyń jaqtastary jappaı narazylyq aktsııasyn bastap, olardyń bir toby kongress ǵımaratyna basyp kirdi.
Tún jarymyna qaraı AQSh kongresin jáne Senatyn kúzetetin polıtsııa Tramptyń jaqtastaryn Kapıtolıı aýmaǵynan tyqsyryp shyǵardy. Senat ǵımaratyn AQSh ulttyq ulanynyń jasaǵy kúzetýde.
Vashıngtonda komendanttyq saǵat engizildi.
Keıin Instagram, Facebook, Twitter jáne Youtube Donald Tramptyń akkaýntyn blokqa qoıdy.
Narazylyq aktsııasynan soń AQSh Kongresi daýystardy sertıfıkattaýdy jalǵastyrýǵa daıyn ekenin málimdegen edi.
