AQSh Kongresi úshin kúres: negizgi tartys qaı shtattarda ótedi
ASTANA. KAZINFORM — AQSh-ta aralyq saılaýda Kongrestegi basymdyq úshin respýblıkashyldar men demokrattar saılaý básekesine kiristi.
Saılaý ýchaskeleriniń jumys ýaqyty shtat pen okrýgke qaraı ártúrli belgilengen. Máselen, Vashıngton qalasy, Vırdjınııa jáne Merılend shtattarynda daýys berý jergilikti ýaqyt boıynsha tańǵy saǵat 7:00–de bastalyp, keshki 20:00–de aıaqtalady. Saılaýshylar AQSh Ókilder palatasynyń músheleri men Senattyń bir bóligin saılaıdy.
Saılaý nátıjesinde AQSh Kongresin baqylaý prezıdent Donald Tramp jetekshilik etetin respýblıkashyldarda qala ma, álde oppozıtsııalyq demokrattarǵa óte me — sol anyqtalady. Bul sondaı-aq prezıdenttiń zań shyǵarýshy bılik arqyly óz saıası baǵdarlamasyn júzege asyrý múmkindigine yqpal etedi.
Senat úshin kúres
Bul saılaý naýqanynda Senattaǵy 100 orynnyń 33-i qaıta saılanady. Buǵan qosa, taǵy eki oryn boıynsha kezekten tys saılaý ótedi. Kezekti saılaý naýqanyna túsken 33 orynnyń 13-i demokrattarǵa, al 20-sy respýblıkashyldarǵa tıesili.
Senattaǵy baqylaýdy óz qolyna alý úshin demokrattar qazirgi oryndarynyń barlyǵyn saqtap qana qoımaı, qosymsha tórt orynǵa ıe bolýy kerek.
Saılaýǵa deıin Senattaǵy oryn sany respýblıkashyldarda 53, al demokrattar men olardyń fraktsııasyna kiretin táýelsiz senatorlarda 47 boldy. AQSh vıtse-prezıdenti Djeı Dı Vens respýblıkashyl bolǵandyqtan, senatorlar daýysy teń bólinse, sheshýshi daýys berý quqyǵy soǵan beriledi. Osy sebepti demokrattar Senatta basymdyqqa ıe bolý úshin keminde 51 oryn ıelenýi qajet.
Senattaǵy oryndar úshin báseke Alıaska, Ogaıo, Aıova, Tehas jáne Kanzas shtattarynda qyza túspek.
Ókilder palatasy úshin tartys
AQSh Ókilder palatasynyń barlyq 435 okrýginde saılaý ótedi. Demokrattar Palatada kópshilik orynǵa ıe bolý úshin taǵy úsh okrýgte jeńiske jetýi kerek.
Ballotpedia dereginshe, 46 saılaý okrýgi (12 paıyz) negizgi saıası tartys alańyna aınalmaq. Onyń 25-inde demokrattar, 21-inde respýblıkashyldar basymdyqqa ıe. Eń tartysty saılaý 22 shtatta ótedi. Atap aıtqanda, Arızonada — 2, Kalıfornııada — 9, Koloradoda — 2, Florıdada — 3, Illınoısta — 1, Aıovada — 2, Mende — 1, Mıchıganda — 3, Montanada — 1, Nebraskada — 1, Nevadada — 1, Nıý-Gempshırde — 1, Nıý-Djersıde — 2, Nıý-Meksıkoda — 1, Nıý-Iorkte — 4, Soltústik Karolınada — 2, Ogaıoda — 2, Pensılvanııada — 2, Tehasta — 2, Vırdjınııada — 2, Vashıngtonda — 1 jáne Vıskonsınde — 1 okrýg.
Buǵan deıin AQSh Kongresine aralyq saılaý bastalǵanyn habarlaǵan edik.
