AQSh Kongresi TikTok-qa tyıym salatyn zań jobasyn maquldady

ASTANA. KAZINFORM – AQSh kongresiniń Ókilder palatasy qytaılyq TikTok mobıldi qosymshasyna búkil el boıynsha tyıym salatyn zań jobasyn maquldady.

Qujatty 352 kongressmen qoldasa, 65-i qarsy shyqqan. Zań jobasyna sáıkes, ınternet-platformanyń ıesi ByteDance alty aı ishinde TikTok-ty satýy kerek. Áıtpese, áleýmettik jeli barlyq qoldanbalar dúkenderinen joıylady. 

Zań shyǵarýshylar TikTok AQSh-tyń ulttyq qaýipsizdigine qaýip tóndiredi dep alańdap otyr. Sebebi, qosymsha Qytaı úkimetimen óz paıdalanýshylarynyń qupııa derekterin bólisedi.

Byltyr naýryzda AQSh kongresinde TikTok áleýmettik jelisi basshysynyń qatysýymen jıyn ótip, demokrattar men respýblıkalyqtar bul áleýmettik jeliniń qaýipsizdigine kúmán keltiretin aıtty. Zań shyǵarý organdarynyń ókilderi Beıjińdegi ByteDance kompanııasy TikTok áleýmettik jelisin paıdalanýshylardyń jeke derekterin Qytaı bıligine jetkizedi dep qaýiptenetinin málimdedi. Al bul AQSh-tyń ulttyq qaýipsizdigine nuqsan keltirýi múmkin.

«TikTok amerıkalyq qundylyqtarǵa ıe amerıkalyq kompanııaǵa aınalyp, platforma Qytaı kommýnıstik partııasymen baılanysyn úzýi kerek, - degen edi kongress depýtaty Darren Soto.

TikTok platformasynyń bas dırektory Shoý Tszy Chý AQSh kongresinde ótken jıynda «Biz Qytaıdyń kompartııasymen jumys istemeımiz, olarǵa barlaýshy qyzmetin atqarmaımyz» dep aqtaldy.

«Birinshiden, biz jeli qoldanýshylar arasynda jasóspirimderdiń qaýipsizdigin qamtamasyz etýge mán beremiz. Ekinshiden, AQSh azamattarynyń jeke derekteri syrttan urlanbaý úshin jiti baqylaý júrgizemiz. Úshinshiden, biz úkimet tarapynan TikTok-ty basqarýǵa nemese onyń jumysyna aralasýǵa jol berilmeıdi dep ýáde etemiz», - degen bolatyn. Shoý Tszy Chý.

Aıta ketý kerek, búginde platformany 170 mıllıonnan astam amerıkandyqtar paıdalanady.